本身係亞洲金融集團總裁嘅公職王陳智思（Bernard）尋日上電台分享做ＣＥＯ之道，不過節目一開始，主持人就向Bernard問咗個無厘頭嘅問題：「係咪男士同領袖身上都要有好多通訊器材？」原來節目開始前，主持留意到Bernard身上幾個電話相繼響起，所以對佢點解要咁多通訊器材跟身，感到好疑惑。
Bernard笑言已對高科技產品「上癮中毒」，直認最少要有兩部電話傍身先得。一部係有視像顯示功能的手機，另一部係深受行政人員歡迎嘅黑莓手機，佢仲話平時都係靠部黑莓機同太太溝通，維繫感情喎。Bernard不斷追求更新更快嘅通訊產品，佢好抵死咁話：「每六個月我秘書就會開始驚，因為我買親新嘢都要佢幫我睇說明書，仲要將資料過入新電話度……」Bernard每半年換一次手機，睇嚟佢真係要請多個秘書專門研究說明書先得喇。
Bernard深感用咗黑莓手機之後可以無時無刻覆電郵，工作效率提高唔少。Bernard周身公職，依家仲做埋港區人大代表，而且公司本身嘅業務又不斷擴張，開講有話，時間就係金錢，佢會染上ＩＴ癮，都係因為工作太忙啫。