四川大地震發生將近一年，災區重建正進行得如火如荼。立法會議員陳克勤就趁住五一假期，聯同新界青年聯會四十幾個後生仔一齊去汶川縣璇口鎮探訪。
時至今日，璇口鎮嘅小學仍然在重建中，二百名學生依家只可以喺臨時校舍上堂，閒時嘅娛樂兼運動就係打吓乒乓波。校舍嘅設施好簡陋，好似張乒乓波枱就連球網都冇，學生惟有釘上木板代替。克勤仔可能見張乒乓波枱殘成咁，心諗班學生球技好極有限，所以就唔識死叫埋新界青年聯會主席陳恒鑌向其中兩個小朋友下戰書，結果落得慘敗嘅下場，認真失威。
出發前，克勤仔特別提醒團友探訪期間盡量避免向災民問及地震情況，亦唔好談及佢哋嘅屋企人，因為怕一唔小心就會勾起佢哋嘅傷心回憶。不過，克勤仔去到先知自己過分緊張，因為佢發覺呢班同學比佢想像中積極樂觀，個個都紮紮跳，笑容滿面。村民依家學種奇異果、櫻桃等收入較高嘅農作物，令佢哋每年收入可以由過去嘅六百蚊增加至四千蚊。