唔少市民都會同親朋戚友去茶樓食點心同敍舊，不過立法會議員張學明就喺酒樓打躉打到做埋老闆。尋日係張學明有份投資嘅「大日子酒樓」嘅開張大日子，飲食界嘅張宇人同埋一班董事都有到場支持，認真熱鬧。
酒樓前身君城酒樓喺三個月前已經關門大吉，依家張學明逆市頂上，對飲食業咁有信心？佢話以前差唔多朝朝都喺度打躉，同朋友歎番一盅兩件兼接見市民，之前聽到酒樓要結業都有啲失落，好似無咗個聚腳嘅地方。後來大埔一班社區人士、商人同區議員，包括鄉議局主席劉皇發同鄉紳鄧光榮等齊齊夾份頂嚟做，所以張學明猛話自己只係佔少少股份，因為仲有成十幾位董事，屬柴娃娃性質。
酒樓最緊要食物有水準同埋有賣點，張學明話酒樓鄰近街市，歡迎市民喺街市買埋心水海鮮上酒樓，酒樓廚師好樂意代為烹調，做法同西貢、鯉魚門一樣。
問到張學明有咩拿手小菜推介，點知佢竟然話「攞我命啦，我未入過廚房試菜添」。睇嚟張學明都要快啲試吓菜先得啦，唔係第時好易畀啲街坊問到口啞啞。