本文重點
瘟疫肆虐香江，民間聞豬流感（Ｈ１Ｎ１甲型流感）色變，而港府就受七一恐懼症困擾，而且，後遺症迅速禍及立法會。眾所周知，港府為免激發市民上街，幾乎全部具爭議性嘅立法草案同政策，都逼晒喺下半年出台，立法會政黨最近收到風聲，最低工資立法敲定喺年底提交立法會，加上停車熄匙同政改諮詢，都係第四季出爐，有議員私下慨嘆，唔怕豬流感，最怕港府谷埋「出貨」，真係隨時做死人。
立法會議員成日批評政府歎慢板，臨近會期結束先提交大量草案，迫議員要開快車倉促立法，甚至喺會期結束最後一次會議，開夜車審議通過法例。議員面對港府呢種定期性肉體與精神折磨，一直啞忍，不過正如家暴慘劇，被虐一方一味死忍，只會令暴力變本加厲，港府谷埋大量重要草案喺某個短時間內出台嘅惡習，嚟緊將會愈玩愈過分。
日刨夜刨 慘過會考
港府嘅七一恐懼症病入膏肓，任何有可能激發市民上街嘅敏感政策同草案，一律夾硬押後到過咗七月至出台，政改諮詢就係經典例子，有「網絡廿三條」之稱嘅淫審第二輪諮詢肯定亦唔敢七一前公布，以免成為泛民炮轟港府嘅彈藥，甚至本來話第二季推出嘅醫療融資諮詢檢討，依家都傳緊可能延至第三季。總之到咗下半年，立法會議員大把諮詢文件要睇，日刨夜刨，慘過考會考。
咁都未算，有立法會政黨透露，最近收到消息，港府打算喺年底，將最低工資立法嘅主體法案，提交立法會，到時議會之內硝煙四起，商界代表同基層黨團一場仗勢所難免，但係環境局被的士業鬧到飛起嘅停車熄匙立法草案，聽聞亦有意喺年底上立會，議員要兼顧嘅戰線拉長，變相疲勞轟炸，加埋明年初出台嘅公平競爭法，就係一條龍直落，做到得閒死唔得閒病。
有議員私下投訴，政府以前將草案谷晒喺立法會會期結束前提交，固然係懶理議員死活嘅劣行，今次為咗迴避七一遊行，將具爭議性嘅政策同草案，全部押後到下半年出台，一次過「激安大清貨」，對議員嚟講，同樣係大整蠱，到時肯定做到氣咳，港府簡直係慢性毒殺立法會議員，殺傷率肯定高過豬流感。