本文重點
豬流感迅速擴散全球，全世界幾乎冇乜邊處係零污染地區，其中港人最愛嘅度假勝地美加，更令人聞之色變，香港青聯副主席陳仲尼就話要挑戰流感，計劃暑假飛加國同爸爸慶祝八十大壽，人生難得八十歲，希望流感病毒都要讓吓路囉。
朱鼎健練跑百毒不侵
一班富豪二代尋日無懼流感，齊集維園同數百名來自內地嘅少數民族舉行「民眾文化嘉年華」活動，全國青聯副主席曾智雄、香港青聯主席許華傑及觀瀾湖太子爺朱鼎健都係座上客。曾智雄話大會預備咗一萬個口罩派畀入場觀眾，唔驚病毒四圍散播。為求強壯身體，公子們都有妙方，朱鼎健尋日大晒胸肌同老鼠仔，話每星期至少有兩日喺觀瀾湖嘅公園練跑健身，每次至少跑十公里，底子打得好，真係百毒都難侵。
同場仲有菁英會主席施榮忻，佢話抗疫之道係帶多件衫出街，施生話，香港商場啲冷氣普遍凍到飛起，連佢一個堂堂男子漢都唔多頂得順，真係着少件衫都會「領嘢」染上感冒，佢呼籲啲商場老闆將冷氣調細啲，慳錢之餘，仲唔使令市民冷傷風喎。
卓妮