本文重點
豬流感偷襲香港，人多擠迫地方變成高危區，但尋日賽馬日，沙田馬場照樣係馬照跑，馬會主席陳祖澤（John）賣花讚花香，話馬場草多空氣好，使乜驚流感喎。
馬場尋日有幾場盃賽，卓妮都貢去湊熱鬧，港鐵主席錢果豐及太太錢黃慧玲成為頒獎嘉賓之一，John陳以主持身份帶錢主席去頒獎台，兩位主席相遇，即時擦出火花，John陳指住錢果豐話：「我係主席，佢又係主席，我以前做九巴董事長，同佢嘅港鐵打對台。」即係話兩位主席本來係勢成水火都未定，不過呢個世界真係細，話口未完，John陳話依家係錢果豐嘅主席喎，此話何解，因為John陳係香港會主席，而錢果豐就係香港會會員，論地位，錢主席都要畀畀面喇。
許晉奎鍾情搭港鐵
卓妮轉頭見到馬會大董許晉奎，佢為愛駒「神速金剛」打氣，可惜馬仔三甲不入，反而由阿叔許世勳擁有嘅名駒「勁惑」就跑出第一，但許晉奎左望右望都唔見阿叔入場，冷手執個熱煎堆為阿叔拉頭馬，順便幫阿叔手捧走三十幾萬獎金。講起豬流感，許晉奎自爆唔怕人逼容易染病，佢仲透露鍾情搭港鐵。
許生話晒係富豪之後，身家數以億計，何解偏偏有豪華座駕唔坐，要逼港鐵呢？之唔係貪佢唔會塞車，又唔使為泊位問題大費周章喎。佢笑言：「我係成個家族中最鍾意搭港鐵嗰個嘞。」
卓妮