不過，百分百存款保障又唔係個個都歡迎喎，作風穩健嘅大銀行就好有意見嘞。佢哋認為，喂，有咗政府包底，部分膽生毛嘅小銀行咪唔使驚囉，佢哋可以利用高息吸引客戶存款，然後攞去進行高風險投資，一旦爆煲，政府埋單，關人個關。所以話啫，百分百存款保障並非百分百令人滿意，政府有少少變相鼓勵銀行冒險投資嘅嫌疑。
之不過咁，以前嘅存款保障額上限得十萬咁大把，又的而且確太少。你知啦，香港有好多隱形富豪㗎，公屋居民郁啲都話畀祈福黨呃成百萬，如果銀行執笠只賠十萬，衰過祈福黨騙徒啦。
好嘞，存保會就建議嘞，將存款保障額提高至五十萬，諮詢一下各界意見。存保會係咁講嘅，主要考慮成本效益、國際慣例以及道德風險，當保障額提高至五十萬元之後，得到完全保障嘅存戶百分比，由過往十萬元嘅百分之七十六點九，大幅提升至百分之九十點九。咁又點解唔提高至超過五十萬呢？存保會就話嘞，額外效益唔大，反而成本太高，同時又會增加道德風險。佢哋冇詳細解釋乜嘢叫做道德風險，功夫茶估計，講嘅就係一旦保障額太大，等於變相鼓勵銀行冒險投資。
五十萬保障額到底夠唔夠呢？或者咁講啦，如果真係有九成存戶得到全面保障，剩番落嚟嘅一成，想遊行示威都係得小貓三四隻嘅啫，加上佢哋應該都係有頭有面嘅百萬富翁，乜都有淨係冇時間，邊得閒上街抗議吖！
講咗咁耐，功夫茶其實係想講一樣嘢，如果金管局好好監管銀行，唔理你存款保障係十萬、五十萬定係百分百，完全冇分別。銀行只要正正常常咁去營運，咪唔會執笠囉，冇銀行執笠咯喎，使鬼存款保障咩！
呢嗱嗱嗱，雷曼迷債事件就係由於金管局監管不力，所以搞到咁大鑊嘞。如果總裁任志剛真係好似佢自稱嘅先知先覺，一早阻止銀行銷售迷你債券呃公公婆婆啦。
話時話，假設存款保障最終確定係五十萬，銀行嘅道德風險係咪就等於零呢？計功夫茶話齋，梗係冇可能零風險啦，人始終係貪婪嘅動物，成個金融海嘯根本就係貪婪惹禍，同時又係監管機構失職所致。所以講到尾，無論存款保障係幾多，金管局都有必要監管銀行，否則，唔該年薪千萬嘅任總回水！