喺海南島舉行嘅博鰲亞洲論壇啱啱結束，會上敲定咗，香港將成為海南以外，第一個舉辦博鰲亞洲論壇分壇會議嘅地方，有份為香港申博嘅菁英會主席施榮忻話好高興，而首次會議可望喺今年底揭幕，預計將有五、六個國家嘅重要元首出席。
有份出席今屆博鰲亞洲論壇嘅施榮忻話，今次申博成功，多得前中總會長霍震寰喺背後發功，皆因佢係博鰲亞洲論壇理事，堪稱該論壇嘅「開荒牛」，佢趁今次開會期間大力游說，又投下關鍵性一票，大會終於拍板畀香港搞分壇。
講番菁英會，近期搞作多多。上周五就請到有「乒壇女王」之稱嘅前奧運冠軍鄧亞萍現身東亞運動會展覽館，同班會員分享奮鬥經驗，已故全國政協副主席霍英東長孫霍啟剛都係座上客。
啟剛同鄧亞萍老友鬼鬼，上周六當選為牛津劍橋聯會會長，都請埋一姐去香港會食飯，仲出動掛有「OLYMPIC 1」車牌嘅豪華座駕接載對方，夠晒隆重。