蘇今個月初被揭發以卡片代替入息證明為菲傭續約，雖然佢已經三番四次道歉認衰，但仍然難逃被立法會議員借勢抽水嘅命運，隔兩三日，議員就攞番件事出嚟用作舉例、質詢、或揶揄。政治污點其實好似紋身咁，就算磨穿層皮都好難洗得甩，或者打咗個印，剷都剷唔走，今次阿Greg都算係一失足成千古恨。
連累李少光孭鑊
明日嘅立法會會議，有議員會向保安局局長李少光提出質詢，要求李少光就卡片事件作出交代。李少光做過入境處長，況且入境處今次批出份菲傭合約，即係有份「成全」蘇錦樑背負嘅污點，李少光都好難推卸責任，但係因為一個局嘅副局長自己一時「錯手」，要隔籬局嘅局長去立法會捱鬧，始終都係一件十分難為情嘅事，佢都唔知使唔使搵窿捐。
議員抽水，計起上嚟，明日嘅質詢已經係一個星期裏面嘅第三次。上星期立法會表決財政預算案嗰日，劉慧卿提出修訂動議，要求刪除政制及內地事務局預留請副局長同政治助理嗰筆錢，個個發言嘅議員都攞show卡片事件大造文章，揶揄主角係「卡片副局」、「大支蘇」，搞到佢全程條眉皺到可以夾死烏蠅。尋日司法事務委員會傾開保障告密人條例時，又有議員以入境處職員踢爆卡片局長一事作例子，追問政府點解唔立法保障爆料人。如果畀人講閒話就會打乞嚏，睇怕姓蘇嘅今次想唔鼻敏感都好難。
查實做得高官就要時刻保持戰戰兢兢，如履薄冰嘅心態，特別係政治任命嘅官員，有政治觸覺只不過係好基本嘅要求，就算係不知不覺搞特權，情況咁嚴重，市民係永遠都唔會忘記嘅。有人或者會心存僥倖，以為香港人善忘，過一段時間就會唔記得件事，但明眼人都知日後只要一有高官濫權嘅事情出現，大家一定會重提呢件事。
聞說蘇錦樑做咗副局長之後就同人呻過，話原來做官係一條好孤獨嘅路，只會捱鬧，唔會有粉絲喺身邊歡呼。先係冇咗個加拿大護照，話咁快又留咗一個搞特權嘅紀錄，唔知佢會唔會重新問吓自己：「呢條係唔係我想行嘅路？」