鄧爾邦到底係咪大花筒，唔到佢唔認嘅，審計報告一目了然。最離譜嘅係平機會自把自為，未依法經政府批准就為鄧爾邦購買人壽保險，投保額相等於三年薪金，即係七百萬，涉及保費三萬七千幾。喂，買人壽保險有乜意義先？一來，功夫茶絕對相信，以平機會懶懶閒嘅工作性質，鄧爾邦一定唔會過勞猝死；二來，鄧爾邦始終唔係曱甴，冇人會用拖鞋拍扁佢，命仔冇乜危險；三來，即使真係貪生怕死，買保險都唔使咁鬼鬼祟祟啩，好似旅發局前總幹事臧明華咁吖，同樣係亂用公帑買保險，佢起碼事先得到旅發局上司批准。
講開臧明華，由於佢買咗一份保費高達十七萬七千元嘅超豪醫療保險，所以審計署又係炮轟佢大花筒，結果，臧小姐被迫要回水。照咁睇嚟，鄧主席都好應該要回水喎，吓話？
之不過咁，唔好以為回水三萬七千幾保費就夠，事關呢位邦哥仔舊年預先攞咗一百六十萬約滿酬金。所謂約滿酬金，意思係當一個人完成合約之後，僱主對佢嘅工作表現覺得滿意，所以額外醒佢一筆錢以示酬謝。做得好就話有得醒啫，家陣鄧爾邦淪為罪人，即係做得差啦，而且係差到無倫嗰隻，冇可能得到酬謝嘅。所以話啫，鄧爾邦應該回水嘅金額係一百六十三萬七千！
平機會嘅大花筒表現，梗係唔止自把自為買保險咁簡單啦。根據審計報告，鄧爾邦去北京出差，住嘅居然係每晚租金二千八百八十元嘅「大使套房」。呢嗱，「大使」兩個字真係可圈可點，你可以讀做「大試」，亦可以讀做「大洗」；如果你讀做「大洗」，咁就非常切合鄧爾邦洗腳唔抹腳嘅大使形象嘞。
咦，咪住先，平機會其實係受到政制及內地事務局局長林瑞麟管轄嘅，林公公算唔算失職呢？計功夫茶話齋，林公公如果唔想火燒後欄，一於怒炒鄧爾邦啦，唔使等到明年一月約滿先至唔同佢續約嘅。
講到呢度，功夫茶覺得香港人好可憐，淨係一個平機會啫，喺鄧爾邦帶領下已經涉及亂用公帑至少一千九百萬，加埋其他公營機構，例如嘥錢睇風水嘅應科院，納稅人嘅血汗錢唔知倒咗幾多落鹹水海。
唉，愈諗愈火滾，睇怕鄧爾邦呢個大花筒淨係回水都唔足以平息民憤。功夫茶醒多你兩個字：落台！