立法會前晚馬拉松式通頂表決預算案，高官議員經歷慘遭睡魔煎熬嘅一夜，疲態畢露，去到前晚十一點左右，班局長紛紛走樣，環境局局長邱騰華變熊貓眼，「林D9」林瑞麟就變白臉小生，無晒血色，相比之下，議員跌Watt速度無咁快，「橄欖」陳鑑林、進出口界黃定光同總商會代表林健鋒等幾個，仲識得結伴偷雞外出歎消夜，比喺議事堂坐到雙目呆滯嘅高官精靈得多。
高官議員之中，唔少年過壯年，甚至年近半百，竹戰捱夜或者仲頂得順，通頂坐定定聽預算案辯論，絕對係苦差，尤其對班無經歷直選捱夜特訓嘅司局長嚟講，現場所見，個個幾乎無咗半條命。
前晚八點，預算案三讀表決進入直路，三司十二局官員陸續落立法會撐場，點知辯論愈拖愈長，愈嚟愈唔對路，十點打後，官員開始烏眉瞌睡，要輪流行出議事堂抖氣。坐足全程嘅，只有老薑「孫公」孫明揚、「佳叔」劉兆佳同勞福局局長張建宗，唔係因為佢哋身體好，全因佢哋坐喺度都瞓得着。林D9仲一臉鐵青，口講頂得住，但入咗官員休息室，好耐無出番嚟。預算案之後仲要搞掂埋條膠袋稅法例嘅邱騰華，捱到深宵兩點鐘，埋門投票一刻，索性唔回應議員發言，直接投票，可見佢幾咁歸心似箭。
相比之下，議員雖然都有疲態，但狀態好得多，年屆五十八歲嘅黃容根，仲走入記者室同記者吹水，誇口平日三、四點先瞓，六、七點就會起身，全日都唔會攰，佢叫大家唔使羨慕，因為大家老咗之後都會瞓咁少㗎嘞，簡直係苦中作樂！