立法會前晚挑燈夜戰，啲議員踩足十幾個鐘頭，到咗夜晚人人都疲態畢露，唔少人都醫肚、補充吓能量。3L成員梁劉柔芬（蘇菲）及自由黨主席劉健儀更不約而同買消夜到記者室，為傳媒打氣，佢哋一個買豬扒包，一個買白粥、油炸鬼加糖水，中西合璧啱啱好。
前晚入夜之後，中環一帶烏燈黑火，但立法會就愈夜愈精彩，夜晚十點幾時，啲議員已經直踩約十二個鐘頭，好多人跌晒watt，惟有偷雞去醫肚。蘇菲好有心，走去附近一個茶餐廳柯打咗豬扒包畀記者以示同甘共苦。差唔多一個鐘頭後，劉健儀又柯打白粥、油炸鬼同紅綠豆沙（圖）新鮮運到，夾埋中西式消夜齊晒，冧人都鬧雙胞胎，莫非今日各行各路，一樣心有靈犀？
講番捱夜開會，立法會秘書長吳文華就話令佢回憶起回歸前嘅歲月，當時前港英立法局成日趕夜車，經常開會到三更半夜，秘書處當然甩唔到身，所以佢都習慣晒囉。