行政會議成員梁智鴻（金刀梁）艷福不淺，前日拖住兩位女士去香港會撐枱腳；睇真啲，原來係梁太同千金。梁智鴻個囡囡近日由英國返港探父母，阿囡咁孝順，老竇當然唔想餓壞佢，去高貴場所食得好啲都在所不計。
金刀梁千金生得亭亭玉立，不過就冇繼承爸爸衣鉢行醫，寧願揀做I.T.人，依家喺英國從事資訊科技保安工作。可能唔慣面對鏡頭，梁千金見到記者就面紅紅匿埋爸爸身後面，唔肯透露芳名；但講起工作就淡定回應話，英國經濟都跟隨外圍環境一樣變得好差，如果有機會，唔排除返嚟大中華區打天下。
金刀梁同家人食完飯後堅持行路散吓步。佢話行得路多人都醒神啲，平日喺養和醫院返工，都鍾意行樓梯上上落落，順便鬆吓筋骨。之不過近年香港空氣污染嚴重，行街散步豈不變相做埋「人肉吸塵機」？金刀梁話，香港空氣都唔算太污糟，吸得多未至於會死人，加上散步時只要識得充分利用港鐵通道，避開污濁空氣，咁就冇有怕嘞，果然有辦法！