本文重點
立法會要踩通頂表決預算案，主因係遷就尋日由政務司司長帶隊嘅廣州、佛山訪問團，事關有八名議員擬會隨團離港，隨時令預算案臨門甩轆被否決。呢個訪問團，拆穿咗，其實只係拉雜成軍，有團員踢爆，上星期五下午先至收到港府邀請信，星期六就截止報名，草率成咁，睇怕都係個團唔夠吸引力，所以港府要四圍打鑼搵人啦。更離譜嘅係，八名議員團友，竟然有三人甩底，四人甩隊，搞到咁肉酸，呢個團究竟係「最牛」定「最流」呢？
港府穗、佛訪問團尋日朝早八點集合上船，但係立法會議員只見「I.T.豪」譚偉豪現身，其餘各人，包括會計界陳茂波、中出黃定光、工業總會梁君彥、總商會林健鋒、紡織界梁劉柔芬、廠商會林大輝同中總「ＩＱ博士」黃宜弘全部甩隊，不過交帶落因為前晚通頂表決預算案，尋日無法早起，所以下午自行坐車北上。港府有冇四圍打鑼搵人，不得而知，不過，個團甩皮甩骨，相當難睇，就係肯定嘅事實。
星期五通知 星期六截止
穗、佛訪問團未上船，隊形已經散收收，上船之後，更加暴露其拉雜成軍嘅窘態。以醫學會副會長身份隨團嘅眼科醫生周伯展踢爆，港府上星期五FAX通知佢，金融界名額有位剩，想搵多啲專業界別人士填補，但翌日截止報名，報團報到咁裙拉褲甩，都算人生第一次。由於事出突然，周醫生前日要逼埋做五個手術，仲要推晒今日嘅手術同應診預約，多得港府唔少！
港府臨急徵召團友，發請柬嘅港府，心裏肯定唔好受。睇番份訪問團名單，金融界人士人頭寥落，而且好多唔係第一線人物，港府可以話食咗金融業界大檸檬。
甩底議員解畫 各有理由
穗、佛訪問團呢齣好戲還在後頭，當訪問團下午抵達廣州，準備同內地官員會面之前，「甩團」嘅立法會議員團友終於現身，但只見陳茂波、黃定光、梁君彥同ＩＱ博士，ＩＱ博士代表甩底議員解畫，指梁劉柔芬要留港開梁展文小組會，今日至去佛山跟番大隊；林大輝要參加立法會同區議員嘅定期會面，林健鋒講低要開會，係咪開立法會，唔知！
今次赴會嘅議員，除咗要參觀南沙資訊科技園嘅「I.T.豪」之外，其他全部尋日下午先施施然來到，陳茂波同「I.T.豪」仲講明今日就會離隊，返香港開立法會帳委會同財委會會議，議員們分明醉翁之意不在酒；特區政府應該心知肚明點解。