政府尋日公布，委任香港交易所董事鄭慕智（Moses）接替林李翹如出任教統會主席，下月一日起生效，任期兩年。早喺今年一月，行政會議換班名單中，Moses都盛傳一度榜上有名，只係最終因為金融海嘯，造就喺金融界更具江湖地位嘅李業廣同查史美倫留任坐鎮，令Moses臨門一腳甩拖，依家獲政府委任執掌教統會，都算攞番個安慰獎。
教育局局長孫明揚喺新聞稿讚Moses對教育充滿熱忱，經驗豐富，我哋睇番Moses份公職履歷，的確成本電話簿咁厚，好似教育委員會主席、浸會大學校董會主席同教統會委員咁，其他方面亦唔弱喎，比較多人認識嘅，有足球博彩及獎券事務委員會主席，同埋○二年獲政府委任做研究稅基擴闊嘅新稅項事宜諮詢委員會主席。其實，Moses咁多公職喺身，多一份唔多，少一份唔少，不過，既然入行會臨門甩轆，政府依家做番啲嘢補飛，委任Moses做教統會主席，總算聊表心意啦。