政情：雷曼燒埋身 任總焗認衰

素來牙尖嘴利嘅金融管理局總裁任志剛，尋日第二次就雷曼迷債事件到立法會作供，面對老對手金融服務界詹培忠力數佢監管不力、死不認錯兼且自覺好英明神武，任總終於認低威向公眾道歉。佢承認早前談及雷曼事件時自詡喺處理事件時「先知先覺」，只係一時衝動下講出嚟嘅說話，佢要講聲對唔住。不過佢講完對唔住都死撐，話當日咁講，都係因為畀議員話佢後知後覺，所以至有咁嘅反應。當然，雷曼風波燒到埋身，又點到任總逞強！