合和實業少主胡文新子承父業，逐步接班幫老爸胡應湘（哥頓）打理盤生意，合和二期計劃終於得到政府開綠燈一役開始嶄露頭角。喺公職方面，政府尋日刊憲，委任胡文新做香港理工大學校董會成員，任期三年，由本月一日起生效。哥頓由九七年到○三年做過六年理大校董會主席，睇嚟胡文新真係準備全面接班喎。
政府委任新一批理大校董會成員，新成員有市建局前行政總監林中麟、三十會創辦人之一李律仁同胡文新，全部任期三年，本月一日起生效，再度委任嘅有廠商會立法會代表林大輝同行政會議成員查史美倫嘅丈夫查懋成。林嘅新任期為三年，查就只有一年。
呢份委任名單，以胡文新最特別。眾所周知，胡家同理大淵源頗深，哥頓一直好支持理大，曾經捐助一千五百萬元推動理大發展，連理大學生宿舍東翼都命名胡應湘爵士樓。哥頓九五年做理大顧問委員會主席，九七年做校董會主席，一做六年，○六年轉做理大發展基金董事局主席，幫手揼心口。以哥頓對理大嘅貢獻，理大校董會點能夠少咗胡家代表？