去年十月，自由黨六名立法會議員分家，「3L」林健鋒、梁君彥同梁劉柔芬（Sophie）離開，同劉健儀（Miriam）、張宇人與方剛講拜拜。唔再係親密戰友，感情自然會淡啲，Miriam同Sophie呢對前姊妹尋日就因為牛頭唔搭馬嘴，喺議事堂頂起頸上嚟。
立法會內會尋日傾為秘書處加人手，以應付增開小組會嘅工作量，政黨意見分歧，有人驚一旦通過建議，濫開小組會就會成風，爭論不休。Sophie想做和事老，建議大家斬件討論，傾完防範濫開小組會，再傾加人手啦。不過，身為內會主席嘅Miriam，就直言唔明Sophie嘅建議，指兩樣嘢好難拆開討論。Sophie覺得好意被拒，頂番轉頭：「主席，你好似唔係好明白我！」Miriam不甘示弱頂番轉頭：「係呀！我唔明，你講多次啦。」Sophie再反擊，唔客氣咁話：「對唔住，對唔住囉！我希望主席你用新思維理解我講嘅嘢。」
「3L」退黨，當時就有傳因為「一山不能藏二女」，大家都係咁高咁大，邊個做主席都會有人唔服。不過，傳聞始終係傳聞，Miriam同Sophie尋日頂頸，係一時意氣定係忍唔住度氣，就要問過佢哋兩個至知喇！