但錢大師勢估唔到，家陣香港嘅情況仲大劑，城裏嘅人想急急腳走出去，但城外嘅人連眼尾都唔望一眼香港，更何況話衝入去？
嗱，只要大家喺復活節長假期出街睇吓，人流雖然唔少，卻旺丁不旺財，有商戶推出低至一折減價，又安排啦啦隊做騷，可惜，始終都係冇乜人吼。鬼咩，好多市民已經趁長假期逃出香港，仲有幾多人消費呀！
單係睇吓復活節假期頭一日，機場離境大堂逼到爆就知。喂，乜唔係話金融海嘯捲走市民嘅財富，亦捲走市民嘅消費意欲咩？點解喺經濟不景嘅情況下，仲有咁多人出外度假？
唉，大家有所不知嘞，呢啲叫做苦中作樂嘅咋，好多小市民係趁住幾日假期揀啲平價旅遊套餐出外抖吓氣，唔使谷到爆！
咁當然啦，市民唔肯留喺香港過節，更主要嘅原因係香港嘅景點最巴閉咪就係海洋公園同埋米老鼠樂園，再唔係去試吓昂坪半天吊囉，仲有啲乜景點吸引人？對唔住喎，畀多一個月時間，十隻手指都未必數齊呀！
呢嗱，台灣著名旅遊景點野柳地質公園嘅地標女王頭，早前畀個大陸旅客刻咗「中國常州趙根大」，冇錯係令到景點受到破壞，冇乜公德心，但點都好，台灣都叫做有景點可以吸引到旅客，唔似得香港幾乎係零景點。莫講大陸趙根大唔嚟，香港就算出一個長洲趙根大、坪洲趙根大，或者係鴨脷洲趙根大，老實講吖，都唔知去邊度搵個景點嚟刻字？
唉，睇見同香港一海之隔嘅澳門，功夫茶就要嘆一嘆氣。澳門之前係靠娛樂博彩吸引旅客，但澳門政府識得積極求變，用世界文化遺產為重點宣傳項目，唔再獨沽一味博彩業，卒之吸引到好多唔同類型嘅旅客去澳門消費。
有數據你睇，去年訪澳旅客逾三千萬人次，旅客量首次超越本港，年增長率達一成一呀！
仲有呀，珠海橫琴島又話喺二○一二年建成全亞洲最大嘅海洋樂園，與橫琴一水之隔嘅澳門簡直如虎添翼，對旅客嘅吸引力，唔使多講，肯定勁過依家多多聲。
最好笑係香港特區政府得把口話要維持本港旅遊競爭力，吹晒水話推廣旅遊景點，乜嘢西貢發展成為休閒後花園，乜嘢喺萬宜水庫整個水上活動中心，至今依然影都冇。
港府成日嗌晒救命話冇旅遊資源，之但係成龍開到口話無條件捐出一批古董，政府一來唔識寶，二來就少做少錯，總之一直行拖字訣，搞到新加坡政府冷手執個熱煎堆，又多幾件旅遊鎮山之寶。
有商場舉行復活節「掟蛋」運動會應節，計功夫茶話齋，呢個諗頭有得搞，只不過可改改玩法，最好將成班懶官廢官做靶，係咁，市民何止留港消費呀，仲要晨早排定隊等入場消氣添呀！