首批透過優才計劃成為香港人嘅國際知名鋼琴家郎朗，唔經唔覺做咗港人兩年有多，但相信佢留港時間唔長，事關佢要四出表演。雖然郎朗長期身處唔同地方，但佢對中菜始終有一份感情，連去到法國巴黎，都捨法國菜而食番中菜。
最近英國《金融時報》同身處法國巴黎嘅郎朗，一邊食飯一邊做訪問，地點由郎朗揀，佢好親切咁揀咗一間佢食開嘅中菜餐廳，仲猛咁讚呢間餐廳非常好食，每次佢去巴黎都會帶埋親朋戚友去。記者問佢喺內地嘅時候，係咪想靜靜地食餐飯都難？郎朗話的確係幾難㗎！相信呢啲就係成名嘅代價。
呢間連郎朗都讚不絕口嘅餐廳係咪好好食就不得而知，但價錢有番咁上下，佢同記者兩個人食，食咗豆腐、炸茄子、炒蛋同蒸飯等合共七道菜式，連埋生果、湯、茶及貼士，盛惠一百歐元，即係超過一千港元。話就話人離鄉賤、物離鄉貴，但郎朗去到全世界一樣咁受歡迎，呢個月下旬仲會到英國表演添。唔知佢幾時再嚟香港搞演奏會呢？