過埋呢幾日嘅復活節假期，下月又到端午節，同時亦係鄉議局主席劉皇發太太以薑會友嘅好日子。「發嬸牌」酸子薑在政圈中響噹噹，幾年前因為專業會議「大舊石」石禮謙試過讚不絕口後，消息傳遍立法會，發嬸於是一次過浸五十九樽送畀發叔班議員同事，去年更吸引到一位問責局長預早訂定今年嘅貨，仲想向發嬸偷師添，大家估吓係邊個？
被發嬸酸子薑吸引到嘅就係發展局局長林鄭月娥，佢上月底出席發叔榮任行政會議成員盆菜歡宴大會時，仲當面提醒發嬸唔好忘記佢張定單。娥姐被喻為「好打得」局長，已經好夠薑，仲要食薑？娥姐話，發嬸炮製嘅酸子薑好好味，過去已經同發叔講咗好多次，今年要預埋佢一份，仲問埋發嬸幾時開工整酸子薑，佢打算親自上門偷師喎！
發嬸曾經講過，其實整酸子薑無乜秘技，主要係因為農曆五月嘅子薑最靚最好味，切片後再用醋同糖浸就大功告成。不過，發叔今年多咗個行會成員身份，睇怕啲酸子薑又要預埋一班行會成員嘞，發嬸肯定切薑切到手軟，但難得各方好友賞面，相信發嬸都樂此不疲。