商務及經濟發展局副局長蘇錦樑（Greg）單「Show卡片為菲傭續約」搞到滿城風雨，唔少曾經被入境處留難過嘅外傭僱主梗係一肚火，只要聽過吓電台嘅烽煙節目都好清楚。至於當事人阿Greg雖然備受困擾，尋日都冇被情緒影響工作，如期出席東九龍電腦節嘅「副局長教砌機」活動。
尋日係阿Greg喺卡片風波後出席嘅第一個公開活動，佢明顯有啲憔悴，但講起砌機就生番晒。原來阿Greg好鍾意砌機，有成十幾年嘅「機齡」，佢話砌機唔單止實惠，仲可以砌出一部啱晒自己心水嘅電腦。大會仲安排年輕歌手泳兒即席向阿Greg學砌機，阿Greg果然唔係得把口，對啲電腦配件瞭如指掌唔在講，仲加埋旁白，三兩下手勢已經砌好部電腦。阿Greg知道泳兒係初哥，好細心咁砌慢啲，等泳兒可以睇清楚啲步驟。
雖然是非纏身，阿Greg砌機都不忘搞Gag製造氣氛。佢話「其實砌機應該容易過烹飪」，又讚女仔手指幼，砌機反而比手指粗嘅男仔有優勢，藉此鼓勵吓泳兒。阿Greg砌完機後，當然要面對番佢嘅困擾，再就卡片風波道歉，承認喺事件中處理粗疏，唔知大家收唔收貨呢？