政府非物質文化遺產諮詢委員會現正制訂非物質文化遺產清單，稍後會展開諮詢，但這類遺產定義相當抽象，難以界定之餘，隨時引起重大爭議，甚至掀起政治風波，好似清拆天星碼頭有辦你睇，究竟決定放乜嘢入清單，確實難到一班委員會委員。作為委員之一嘅前香港歷史博物館館長丁新豹話淨係點樣界定呢類遺產已好混淆，點保存遺產就更加刁鑽。
自從○三年聯合國教科文組織訂立《保護非物質文化遺產公約》後，世界多個城市都紛紛制訂遺產清單，港府去年才成立諮詢委員會，進行非物質文化遺產普查。社會對非物質文化遺產嘅提議花樣百出，由阿姐汪明荃聲嘶力竭捍衞嘅粵劇文化以至打醮、廟會、宗族儀式、傳統手工藝等，五花八門乜都有人建議，甚至有政黨建議將茶餐廳、「九龍皇帝」曾灶財嘅墨寶放入清單內。
保留準則有待決定
丁新豹尋日在電台節目同一班年輕人討論有關議題時，有後生仔提議將打小人、燒街衣、龍舟競渡打鑼鼓、六四燭光晚會一併加入清單內；亦有人質疑如何決定保留準則，認為強行保存只會破壞文化進程；又有人擔心港府虎頭蛇尾，搞搞吓變成石沉大海。若然好似「八萬五」房屋政策和發展中藥港，原來一早取消咗都無人知，咁就認真該煨囉！
丁新豹即場就幾個例子做咗回應，大家不妨聽吓。首先他指粵劇並非急於保留嘅技藝，事關仲有好多人唱粵曲，反而一啲瀕臨消失嘅地方戲劇，就要諗辦法及早保存。咁曾灶財墨寶又應否保留呢？丁新豹就叫大家唔好搞錯，曾灶財並非九龍皇帝，亦非歷史一部分，只可當為集體回憶，有冇文化價值就見仁見智嘞。佢話，喺有啲書法家眼中，曾灶財嘅墨寶似塗鴉多過書法；如果列入清單，等於鼓勵非法塗鴉喎，認真係審死官！
點樣保存仲未有計
茶餐廳又點呢？丁新豹話，茶餐廳擺明就係實在嘅「物質」，只可當係本土文化一部分，反而茶餐廳內嘅絲襪奶茶、菠蘿包及雞尾包嘅製造技藝，就可以成為非物質文化遺產。其他合資格加入清單嘅項目仲有麵粉公仔、打醮儀式及馬騮戲等。不過，丁新豹覺得馬騮戲好殘忍，所以制訂清單時要有客觀標準去衡量；至於點樣保存就更加刁鑽嘞，目前仲未諗到有乜辦法去保存呢啲非物質文化遺產喎！睇嚟繼古物保育後，呢個非物質文化遺產問題亦勢必成為社會爭議嘅話題。