黃宏發○四年不再連任立法會議員，卻開展咗佢嘅寫意人生。呢兩年，佢開始翻譯唐詩，每日大約朝十晚六返到佢喺上環嘅寫字樓，好似返工一樣。佢將自己埋藏喺書堆同字典堆裏面，為咗一個詞語，可以推敲好耐，再三翻查工具書，務求搵出一個最完美嘅譯法。
舉個例：「去年今日此門中，人面桃花雙映紅，人面不知何處去，桃花依舊笑春風。」呢首唐朝詩人崔護嘅七言絕詩《題都城南莊》，其中第二句嘅「雙映紅」，發叔將佢譯成re-doubly aglow，佢解釋話，double已經係雙重嘅意思，但只有redouble至可以譯出「雙映紅」，用咗呢個字，佢好滿意。慢工出細貨，至今佢翻譯咗三十幾首唐詩，不過發叔話，譯過詩先至知道，譯詩有時都好寂寞㗎！可以理解嘅，香港人愈來愈冇耐性閱讀文字，中、英文嘅水平都差過以前，有興趣同有修養譯詩嘅，又有幾人？
離開立會翻譯唐詩
環顧發叔嘅新竇，與其話呢個係一間寫字樓，不如講係一間書齋。卓妮去到上環呢間商業大廈嘅二樓，按發叔所畀嘅門牌按鐘，佢打開門，就見到呢個「商業單位」裏面嘅三面牆壁都放滿書，枱上嘅書亦亂中有序。人生有好多階段，八十年代基本法起草，發叔唔係基本法起草委員，但佢埋首寫佢自己嘅基本法，對政治、財政等有佢自己嘅一套睇法。
九七年佢由立法局主席之位退下，佢又好想寫一本有關會議法嘅書。想不到近呢兩年，發叔除咗偶然論政，讀書時亦有修讀英國文學嘅佢，竟然愛上翻譯唐詩。
醉駕出事 揸車唔飲
發叔愛紅酒人人都知，佢嘅書齋又點會冇紅酒？書齋有一個小小嘅酒櫃，藏酒唔算多，大約有二、三十支，平嘅、貴嘅都有。
發叔曾經因為醉酒駕駛出事，經此一役，發叔話，如果準備揸車，就唔會飲酒。除咗酒，發叔亦愛煙如命，從來唔理煙同酒會唔會危害自己嘅健康。不過佢話：「食少啲煙喇，因為加咗稅，貴呀！」
一位退休人士要維持一個寫字樓，其實都好貴，不過發叔依然自得其樂，值得嘅！發叔仲有個漢詩英譯嘅網頁添，網址就係：www.chinesepoemsinenglish.blogspot.com，發叔嘅卡片仲印有佢嘅願望：「敬請瀏覽並賜教！」如果大家有興趣嘅話，不妨上去睇吓啦。
卓妮