昂船洲發音似粗口，本來係非戰之罪，祖宗十八代留落嚟嘅名，係咁叫就係咁叫，冇辦法。之不過咁，家陣嘅昂船洲又名副其實「戇乜乜」喎，點解？因為多咗一條昂船洲大橋。全長一千五百九十六米嘅昂船洲大橋，尋日終於合龍嘞，隆而重之嘅合龍儀式由運輸及房屋局局長鄭汝樺主持。
昂船洲大橋有幾咁「戇乜乜」呢？首先，造價嚴重超支，原定工程費用係二十七億，埋單估計要三十七億，超支比率接近四成。呢嗱，納稅人又畀特區政府搵笨嘞，無端端使多咗十億冤枉錢。納稅人如果有得揀，寧願你攞十億去接濟老弱傷殘失業大軍好過啦！
其次，昂船洲大橋原本預期喺○八年六月落成嘅，點知一拖再拖，要遲至○九年嘅四月七日先至話合龍。合龍咋，未落成㗎，正式通車啟用相信要等到今年年底。搞乜鬼遲咁多？官方解釋係天氣惡劣喎。計功夫茶話齋，呢個解釋確係充滿昂船洲風格，你去賴個天，不如賴埋地硬吖！
仲有，昂船洲大橋原本好巴閉㗎，如果準時落成，會係全球第一斜拉橋，主跨長達一千零一十八米，可惜吖，家陣極其量只係全球第二。點解會咁嘅呢？笨手笨腳慢吞吞囉，祖國蘇州嘅蘇通大橋快手快腳舊年六月通車，人哋嘅主跨長度係一千零八十八米，贏咗香港七十米。即係咁，只要你早少少落成，做一日世界冠軍都好吖。
嚴重超支，工程延誤，鬥長失敗，呢啲都算嘞，最令人覺得「戇乜乜」嘅係，橫跨藍巴勒海峽、連接葵涌以及青衣嘅昂船洲大橋，其中一項主要任務係駁通貨櫃碼頭，紓緩繁忙交通，結果呢？滑稽咯，葵涌貨櫃碼頭嘅物流量買少見少，家陣嘅交通唔係好繁忙㗎咋，貨櫃從業員好鬼死清閒。
唉，講起真係一殼眼淚。香港嘅貨櫃碼頭原本係全球第一最繁忙嘅，點不知，跌吓變咗第二，跌吓變咗第三，失驚無神整多個金融海嘯，吞吐量江河日下，物流業苦口苦臉。你期望特區政府好似外國政府咁樣重拳出擊救市救人咩？你就真係昂船洲咯，曾蔭權政府真係好「不該」㗎，乜都唔做，齋等運到。
主持合龍儀式嘅鄭汝樺局長好高興咁話，昂船洲大橋將會係香港嘅新地標。嚴格嚟講，鄭局長又講得冇錯喎，「昂船洲地標」吖嘛，視乎你所講嘅「昂船洲」到底係咪「戇乜乜」囉。