新界東立法會議員陳克勤以前喺特首辦做過，佢當時自嘲入政府學影印，可能由此悟出浪費紙張係一種罪孽嘅道理，入咗議會之後大搞環保議題。克勤仔嘅影印技術如何，大家唔知，不過，講到環保，佢竟然冇頭冇尾，提咗個超豪太陽能發電方案。
克勤話，本港有好多堆填區，丟空好浪費，不如擺個太陽能發電板陣製造再生能源，不過根據佢提出嘅資料，要擺滿咁多個堆填區，原來要成九億元，咪即係搞九個維港巨星匯爛騷咁多錢？成效係點，如何運作？佢又未有詳細計劃。
咁多項環保議題，克勤仔又揀咗最近好「Hit」嘅古樹保育，佢諗住食番前立法會議員「蔡菜子」蔡素玉條橋，重提以私人條例草案，立法保障古樹名木，只會先將草案微調，再提交「樹王」唐英年過目。呢個建議早喺四年前已經被政府拒諸門外，今日再提，結果都係一樣啫。
克勤仔上任特首辦特別助理前，曾經講過話「第一天要先去學影印」，佢果然影印得好足。其實蔡菜子喺環保方面諗頭好多，克勤仔做議員時間尚淺，不妨虛心啲向佢學習吓。