距離本月二十二日進行嘅預算案投票只係剩番兩個星期，之前一路好整以暇嘅財政司司長鬍鬚曾，近日終於瞓醒做嘢，今日會約見外號「五散人」嘅五名獨立議員拉票，下個星期四就約咗自由黨見面。不過同樣起到關鍵作用嘅工聯會，就至今都未收到鬍鬚曾嘅邀請，唔通政府預咗佢哋唔敢玩嘢，最後一定會歸邊支持預算案？
立法會就預算案投票嗰日另一個焦點，就係政制及內地事務局局長林瑞麟會唔會被減薪削資。我哋日前已經寫過，有立法會議員因為不滿煲呔曾押後政改諮詢，決定搵林D9嚟祭旗，計劃提出修訂刪去政制局內有關政制事務嘅開支，以及按比例削減林D9嘅薪酬，具體金額依家仲計算緊。
尋日又有議員提出多一項修訂，要求刪去政制局轄下有關駐內地辦事處嘅一億二千萬元開支，令林D9兩面受敵。人工要減嘅原因，原來係每年有大量港人喺內地被無理扣押，但林D9淨係掛住去四川探熊貓，唔肯派人探望同營救呢啲身陷險境嘅香港人，又係白
人工唔做嘢，因此建議刪去有關開支。