平價水貨向來無保證，但偏偏有人貪平博一博，出事後先至醒覺。一向在地區打滾做慣醒目仔嘅立法會議員甘乃威，個多月前在灣仔手機專門店買咗部大牌子嘅水貨電話，但用咗個多星期就壞咗，認真化學，最煩就係要返去換機，所以佢奉勸大家千祈唔好買水貨。
甘乃威自從榮升立法會議員後，雷曼事件為佢打響頭炮，工作停不了，佢仲懂得用科技做支援，座駕上仲安裝咗個GPS全球衞星定位導航系統，利用電子地圖幫手搵路。甘乃威話，每當離開港島區佢就會變成路盲，好似尋日由中環去粉嶺出席活動，用GPS只需約半個鐘就到，否則起碼要一個鐘。
甘乃威又話，以前曾經在黨友嘅一間資訊科技公司擔任銷售工作，所以現在有機會做「白老鼠」免費試用導航系統，慳番千幾蚊，但有權利就有義務，就係遇到系統有任何錯誤要即時向系統公司上報予以更正，其實都係舉手之勞啫！