本文重點
海洋公園保育基金主席陳晴（Judy）自從上任之後，愈來愈鍾意動物，○七年中佢就去咗四川臥龍領養一隻熊貓女，改埋同一個名叫「晴晴」，但究竟佢使咗幾多錢助養始終係個謎。直至前日Judy出席一個活動，佢終於透露一次過畀咗六位數字，即係過十萬元，仲話就算自己食少啲都要領養晴晴喎！
復活節焗留港
Judy一向鍾情Hermes Birkin手袋，但前日見佢轉咗牌子，一身LV（Louis Vuitton），包括LV外套、頸巾及價值萬多元嘅新款帆布大花手袋。講開心愛嘅熊貓女晴晴時，Judy顯得相當雀躍，話如果晴晴健康成長，可以有三十幾年命，晴晴現時只得兩歲幾，相信可以陪佢到老，遲啲仲可能領養多幾隻添！
問Judy復活節會否外遊？佢就話好多會要開，而且負責熊貓嘅工作又忙，所以都要留港。每逢過時過節，Judy一有時間就會返福建探望父親陳佐洱，佢話父親依家幾好，享受緊退休生活喎！