本文重點
足總徹查球圈打假波疑雲，立法會足球隊下月九日決戰政府高官隊，雙方肯定全力以赴，唔敢放軟手腳，攔腰掃腳插鼻哥，肉緊程度相信不遜議事堂內嘅肢體衝突。不過，戰果不難預測，港府弱勢，高官隊好大可能輸勢又輸陣，呢場賽事最令人驚喜嘅，反而係自上年初因傷暫別球隊嘅專業會議劉秀成，將會破關出山再次守龍門。連劉教授都唔使再錫身，高官隊喺議員眼中有幾勁，可想而知。
劉教授上年以六十三歲之齡為立法會球隊上陣，喺三月一場同外國駐港總領事隊對壘時，為英勇撲救險球，頭、臉部着地，血流披面，仲一度短暫失憶，要入院留醫，出院之後，右眼又黑又瘀，真係見者心酸。身體要緊，劉教授再無參加新一屆立會足球隊，今次佢突然決定重披戰衣，梗係有特別原因啦。
港府隊弱雞容易食
劉教授尋日透露，上年濺血掛彩，傷勢已經完全康復，下月九日立會隊對高官隊場波，佢百分之九十九點九會落場打真軍。劉教授再展雄姿，固然係好事，之但係，劉教授傷愈成年，立法會隊亦出征咗三次，佢點解揀正對高官隊先至出山呢？劉教授解釋，上一屆立會隊嘅後防好唔掂，打龍門嘅辛苦到嘔，今屆就好唔同，三場波都未失過一球，證明後衞有料到，而且，佢不屑咁講咗一句：「班高官有幾叻吖！」原來呢個先至係劉教授復出嘅主要理由！
立法會足球隊領隊譚偉豪尋日聽到劉教授出山消息，大為振奮，話依家球隊嘅後衞同龍門，全部都係搵外援，議員打晒前鋒、中場同左右翼，如果劉教授回巢，一定要佢歸位守龍門，咁樣立法會隊支隊形就出番晒嚟嘞。嘩，有本地甲、乙組球隊退役職業球員幫腳，唔怪得立會隊嘅後防咁固若金湯，有呢班外援把關，加上港府隊咁弱雞，唔怪得劉教授嘅太太可以咁放心畀佢歸隊啦。
印象中，港府隊以前嘅腳膽，有特首辦助理處長陳羿同政制及內地事務局局長林瑞麟，陳羿話晒年輕力壯，走得跑得，依家剩低「林D9」，瞄頭更細，唔知其他司局長有冇諗住挑戰劉教授嘅五指山呢？