本文重點
上海近日躋身「得寵」名單，獲阿爺開口扶植為國際金融中心，擺明同香港拗手瓜。上海到底有冇能力「生金蛋」，睇多幾年就見真章，但原來唔少名人已靜雞雞移民上海。全國政協委員鄭明明早年已喺上海買豪宅買商舖，佢預期十年後嘅上海將「不得了」，港人係時候去上海插旗，唔係就蝕晒底喎。
明明姐尋日出席美容活動，講起上海將變成經濟龍頭，佢話冇乜咁奇，齋睇金融海嘯後內地人繼續豪使錢，就知佢哋「食力」有幾強，尤其上海被「欽點」後，地產市道蠢蠢欲動，近日有唔少地產經紀打畀佢，話上海樓市又再熱鬧番，雖然樓價未有太大升幅，但投資者入市意欲大咗，唔少人都想買定層樓，等上海大時代來臨時有個「竇」喎。
為美容院抱不平
明明姐又話，身邊啲娛樂圈老友近日索性舉家移民上海，仲拖埋仔女返上海讀書，早啲融入當地文化。上海有本事吸埋香港班有錢佬啲錢，認真唔簡單。回想十幾廿年前，內地人千方百計移民香港發財，依家輪到香港同胞北上掘金兼落地生根，真係風水輪流轉。
反觀香港人，搵食愈來愈艱難，近日美容界更畀銀行「蝦」到上門，遊行反擊。銀行延長對美容公司客戶嘅信用卡交易付款期，明明姐都話要抱不平，坦言有美容院嘅數期長達二百日，資金周轉好困難，最慘係金融海嘯下，客人使錢扮靚唔及以前手鬆，業界生意跌咗三成，偏偏業主唔多體諒，唔似沙士及九七金融風暴時願意減租，所以呢個寒冬，前所未有咁寒喎。
卓妮