本文重點
保良局董事局尋日換屆，身為總理嘅玩具大王太太蔡李惠莉都有出席。蔡太透露，老公蔡志明雖然貴為馬主，不過睇跑馬唔鍾意入場，而係匿喺遊艇上。
原來玩具大王名下有幾艘遊艇，其中一艘更有百幾呎長，艙內有十幾間房，設備超豪，佢一有時間就同家人一齊出海呼吸新鮮空氣，遇着賽馬日更會扭開部電視機，一邊吹海風，一邊睇跑馬，不知幾爽。咁樣豈不是會錯過拉頭馬機會？蔡太笑言冇所謂，話反正老公唔鍾意同人逼，喺船上睇馬更自在。蔡家認真係大自然迷，蔡生仲喺西貢滘西灣買咗個幾千呎大嘅魚排，養咗石斑、鱲魚、火點等，閒來一家人出海釣魚，寫意到極。
顏顏寶鈴卸任感觸多
講番保良局換莊，顏顏寶鈴卸任主席一職，由何志豪接班。顏太臨別致辭感觸多，佢自嘲好黑仔，上任做保良局主席冇耐就遇上四川大地震，善長捐錢全部去晒四川，五月至七月期間幾乎撲唔到水，一心諗住八月出擊，點知九月又遇着金融海嘯，惟有低聲下氣四圍搵老友解囊，又自揼心口捐款二千幾萬，所以佢寄語新任主席都要「低聲下氣」做人喎。
顏太落力「撲水」外，身為總理嘅莎莎老闆娘郭羅桂珍就認真威威，佢喺過去一年籌到八百五十幾萬銀，榮登籌款最多總理嘅榜首。
卓妮