先講講病樹嘅畸屎。赤柱嗰一棵殺人刺桐，明明病到五顏六色，直情係奄奄一息，街坊仲話發出惡臭添，康文署派出所謂專家去睇過，睇來睇去睇唔到有乜嘢問題。呢類專家，理論上即係樹木醫生，可惜原來係非常搵笨嘅黃綠醫生。卒之，病樹頂唔順嘞，冧咗落嚟砸死一個好無辜嘅十九歲女生。於是乎，曾蔭權急急腳補鑊，指定政務司司長唐英年負責跨部門管理全港樹木。功夫茶記得，唐唐曾經自稱「行運醫生」，今次又睇吓佢呢個臨時見習樹木醫生有冇運行。
好嘞，人病咗又點呢？最近有一單畸屎係咁嘅。有一位七十三歲嘅徐伯，今年一月因為腹痛以及大便出血而去荃灣仁濟醫院求診，醫生幫佢做咗Ｘ光造影檢查。然後，徐伯等呀等、等呀等、等呀等，等咗成個月都未見醫院有消息，完全唔知檢查有乜結果。到咗二月，徐伯又因為腹痛加劇，再次幫襯仁濟急症室。今次又點呢？老模老樣，完全唔知檢查有乜結果，醫院淨係為佢排期四月去外科專科門診覆診。
古仔講到呢度，大家係咪覺得好離奇？冇錯嘞，確實係離奇到匪夷所思，堂堂一間精英雲集嘅公立醫院，居然兩次都查唔出病人到底有乜嘢問題。徐伯嘅家人自然同樣覺得離奇，所以佢哋做咗一個英明決定，就係送徐伯返內地求診。內地醫院透過大腸內窺鏡檢查，即驗即知，跟手宣布一個好得人驚嘅壞消息，徐伯患上腸癌！
嘩！死得佢吖，腸癌竟然睇漏眼！如果徐伯聽晒仁濟醫院支笛，真係傻更更等到四月先至覆診，一再延誤救治，腸癌可能已經攞咗佢命。家陣大話夾好彩，內地醫院第一時間幫佢做切除大腸手術，終於保住條命。
你話吖，香港係咪一個好奇怪嘅地方？話就話科技先進醫學昌明，實際上牛皮燈籠點極唔明。如果你好不幸打敗仗成為病人，更加不幸係入咗公立醫院，該煨咯，學似粗口議員話齋，你係一個Poor Guy！
吖，等功夫茶試吓數手指先：一次醫療事故、兩次醫療事故、三次醫療事故、四次醫療事故、五次醫療事故……死火嘞，數唔晒，今次到底係第幾次醫療事故？如果有人將近年嘅醫療事故編列成書，詳細講番黃綠醫生點樣打錯針、輸錯血、切錯乳諸如此類，應該有機會成為暢銷書。至於東區醫院遺失嬰屍嗰一單千古奇案，可以改編為懸疑詭秘嘅靈異小說。
計功夫茶話齋，唐唐呀，如果閣下真係行運醫生，麻煩你管完全港樹木之後，再跨部門管一管全港廢柴。生氣勃勃嘅樹木就話通街有得見啫，死氣沉沉嘅廢柴又去邊度搵呀？好簡單㗎咋，你去醫管局行一轉，兜口兜面都係廢柴！