作家陶傑嘅菲律賓係「僕人國家」論，激起菲國朝野群起攻之，要求道歉之餘，仲下令將佢列入黑名單，禁止踏足菲國。呢股怒火愈燒愈烈，近日更蔓延至社交網站Facebook，結集力量大反擊，鬧到佢體無完膚！
陶傑口口聲聲話願意道歉，但竟然於四月一日愚人節，在電台節目以西班牙語向菲國人民致歉，菲律賓以前係西班牙殖民地，有「小西班牙」之稱，陶傑呢種「騎呢」道歉方式，係咪諷刺菲律賓係殖民地就要問佢至知，但咁嘅道歉當然未能為事件降溫，反而火上加油，更令菲國人民反感，本地菲律賓團體已聲言在後日發起遊行示威，要陶傑還菲國尊嚴。Facebook已有多個群組狠批陶傑，仲出現咗個名為「一百萬人要求陶傑向所有菲國人民道歉」嘅群組。
呢個群組不斷召集成員加入聲討陶傑，群組人數尋晚已累積至七千七百多人，共有七百四十六則留言，批評陶傑之聲此起彼落，鬧佢侮辱菲人及菲籍家庭傭工，搞種族歧視，甚至有人爆粗鬧佢，亦有成員將佢個英文名「Chip Tsao」改成「Cheap Tsao」，又有人將佢嘅相片「加料」，變成魔鬼，更有人在他相片上加上禁止標誌，並寫上「Stupidity is a Crime」（愚蠢行為係罪行），睇嚟陶傑有排唔得閒。