我哋成日都話，奮戰政界同喺娛樂圈浮沉本質一樣，都係鬥人氣、玩曝光率遊戲。商務及經濟發展局副局長蘇錦樑（Greg）尋日出席東九龍電腦節做主禮嘉賓，同場面對兩位I.T.大使、人氣偶像歌手傅穎同劉浩龍，一啲都唔怯場，仲反客為主，主動邀請兩名歌手一齊做騷，戴住拳套影相謀殺菲林，一於同佢哋搶鏡頭。
阿Greg出席酒會，唔係被政治記者包圍，就係被商界人士拉住傾偈。尋日出席電腦節，班電車男相信無乜邊個對佢有興趣，反而同場嘅傅穎同劉浩龍，就一直畀娛樂記者嘅鎂光燈射住。不過阿Greg就一於話之你，仲愈戰愈勇，到主禮儀式尾段仲主動同身邊嘅傅穎同劉浩龍講：「不如我哋一齊戴住拳套，畀記者影相吖！」即時謀殺咗唔少菲林。
阿Greg話，出席東九龍電腦節，在公在私都啱晒佢，事關佢十幾年前已經自己學砌機，即係落手落腳砌電腦，上次深水埗電腦節，因為人多爆棚，佢過門不入；今次香港電腦商會唔止搵佢做主禮，仲叫佢喺十二日嘅閉幕儀式上，表演即場砌機，大會依家聯絡緊近期紅爆嘅「蘇絲黃」，同場表演煮餸，鬥吓邊個快；如果成功，就會上演一場「雙蘇會」。