本文重點
中央宣布支持上海發展成國際金融中心，香港政商界議論紛紛，有人擔心北京此舉係想分散風險，以後香港金融舊大芝士被人分咗一半，香江前景堪虞。前商務及經濟發展局局長馬時亨眼見香港有咁大隱憂，恨鐵不成鋼，離開政府大半年來一直封嘴唔評論政府施政嘅佢，尋日終於忍唔住開腔，叫香港唔好做《伊索寓言》龜兔賽跑裏面嘅大懶兔，唔係好易畀上海追到！
中央明確支持上海喺二○二○年發展成國際金融中心，有熟悉國情嘅政界人士明言，呢個訊息對香港其實好得人驚，只係一般人察覺唔到。呢位仁兄話，北京嘅舉措，係一種風險管理手法，以前將中國金融發展大任押注香港，依家決定扶助上海，就係唔想將所有金蛋放晒喺一個籃入面，香港以後有乜依郁，北京隨時可以棄車保帥；香港無嘢叻，一味自恃有北京呢個大靠山，以後如果連呢個優勢都無埋，前景真係危危乎咯！
近年退休高官紛紛打破沉默，對政府有乜睇唔順眼，一樣照炳如儀，唔使客氣，前工商及科技局局長王永平、回歸前位至副布政司嘅陳祖澤，同埋即將退休嘅申訴專員戴婉瑩前後發過炮，香港金融中心地位依家岌岌可危，終於輪到去年喺高民望下因腦病主動請辭嘅馬時亨出嚟鞭策港府。
肥亨尋日喺一個電台節目上，提到上海威脅香港金融中心地位問題。佢以權威人士嘅口脗講，一個地方要成為國際金融中心，必須符合四個特點，即係資金自由進出、金融監管制度畀到投資者信心、金融人才充裕，同埋得到各國政府配合，香港依家已經做到呢幾點，所以始終佔優。不過，肥亨加多一句：國家十年內一樣做到。即係話，如果香港做大懶兔，遲早會被孜孜不倦發展嘅上海追過。
「永遠自強不息，不怕競爭」
肥亨語重心長話，香港雖然有優勢，但千祈唔可以鬆懈等運到，除咗上海之外，亞洲其實仲有其他地區都謀住國際金融中心呢個油水位，呼籲港人本着「永遠自強不息，不怕競爭」嘅心態，面對競爭。佢仲舉番自己在任時力抗新加坡威脅嘅經驗，與港府共勉之。佢話：「我○二年做財經事務及庫務局局長嘅時候，啲人成日問我新加坡幾時會取代香港國際金融中心嘅地位，依家都贏咗，冇人再提啦！」
肥亨半生打滾財金界，退休之後，都忍唔住為香港金融中心地位問題告急，香港前路有幾兇險，有目共睹，特區高官唔該反省吓啦！