本文重點
金融海嘯拖累唔少富豪身家縮水，捐錢能力大減，好多慈善機構都喊救命，為籌募經費苦腦，但如果識搵嘅話，善長仁翁大有人在。同樣在金融海嘯中損手嘅「玩具大王」蔡志明就無有怕，繼續逆市捐錢做善事，繼日前捐出三百萬元贊助鄉議局興建新大樓後，嚟緊仲會捐出兩筆巨款，夾埋仲貴過買畀兒子加讚嘅二千萬林寶堅尼跑車。
蔡老闆本身係香港童軍總會新界地域會長，最近決定科水一百五十萬元畀總會興建元朗童軍營地，等啲童軍多個活動地方。不過，鄉議局同新界童軍呢兩筆捐款都只係濕濕碎，事關身兼沙田體育會名譽會長嘅蔡老闆，嚟緊會捐出三千萬元畀體育會，在沙田區興建新會所，仲會按情況包底，多除少補！
有能力咪捐多啲
蔡老闆坦言，自己平時冇乜買股票，但金融海嘯下，佢有份嘅兩間公司股份帳面都唔見八至十億元，佢指嗰兩間，就係康健國際和富豪酒店。卓妮翻查兩間公司資料，發現他擔任副主席兼非執董嘅康健國際股價，在上月初跌到落一仙，已經跌無可跌，而蔡老闆就在一月初以每股一點五仙沽出手頭四成股份套現，成交價約六千七百多萬元。至於他擔任副主席兼非執董嘅富豪酒店，去年就虧蝕八億元，股價跌到落約一元四角。
即使如此，蔡老闆仍然堅持要做善事，仲話無論幾辛苦都要做，加上呢個時勢好多人都捐唔出錢，有能力咪捐多啲囉，但遲啲就唔敢包嘞！
蔡老闆一向主力投資「磚頭」（物業），最廣為人知就係購入九龍城廣場及尖沙咀安達中心作長線投資，所以好少玩股票。好多人話現時係入市好時機，但蔡老闆就唔係咁睇：「我就覺得唔係（入市時機）囉，事關依家嘅樓價，比起○三年沙士嗰陣仲係貴好多，總之我就唔會入貨住啦！」廠家做生意果然夠穩陣！