潮界紅人齊齊「冇面見人」

每款單品或一種打扮可以於潮流界興起，好多時未必會有好深厚的歷史故事去包裝，但只要「示範」嗰位影響力夠強大，幾「九唔搭八」嘅潮流事物一樣可以成為人氣話題。好似G-Dragon將對PEACEMINUSONE × Nike Air Force 1鞋帶從鞋舌頂向鞋頭方向「倒穿」，或者近期Kanye West同埋Travis Scott長期笠住個頭套「冇面見人」一樣，你可以唔跟，但絕對唔可以唔知！
早幾日Kanye West就換上第2款黑色頭套，以全黑造型現身Balenciaga時裝騷，仲要着Nike襪襯YEEZY Foam Runner。
早幾日Kanye West就換上第2款黑色頭套，以全黑造型現身Balenciaga時裝騷，仲要着Nike襪襯YEEZY Foam Runner。

話題高手 「笠頭」洗版

雖然Kanye West近期受到離婚影響，但相信又未至於精神錯亂到「冇面見人」，更何況佢「笠頭」呢個喜好都唔係新鮮事，早於2013年舉行《YEEZUS》演唱會時佢已經試過於舞台上佩戴多款由Maison Martin Margiela為佢設計的鏡面及閃石頭套獻唱。所以近期頻頻戴住頭套現身，相信極有可能係想為自己有份設計的YEEZY GAP製造話題。事關佢每次被影到戴住頭套時都係着上同一款YEEZY GAP Round Jacket（有唔同色），仲要唔知係無心定有意咁腳踏Nike Vandal High波鞋，同埋用Nike襪襯YEEZY Foam Runner。識得將輿論注意力變成公關伎倆，連自己個樣都唔使畀你影到就已經可以輕易攻佔各大媒體版面，證明Kanye West炒作話題功力簡直宇宙級。

Kanye West戴頭套除咗可以避開記者鏡頭外，更可以讓身在adidas陣營嘅佢大膽放肆地穿着Nike Vandal High波鞋。
  • Kanye West戴頭套除咗可以避開記者鏡頭外，更可以讓身在adidas陣營嘅佢大膽放肆地穿着Nike Vandal High波鞋。
2013年《YEEZUS》演唱會上，Kanye West已在舞台上佩戴過由Maison Martin Margiela設計的頭套演出。
  • 2013年《YEEZUS》演唱會上，Kanye West已在舞台上佩戴過由Maison Martin Margiela設計的頭套演出。
有理由相信Kanye West所操刀的YEEZY GAP Round Jacket，設計靈感係來自佢自己身上呢套Pierre-Louis Auvray設計的「爆肌」造型。
  • 有理由相信Kanye West所操刀的YEEZY GAP Round Jacket，設計靈感係來自佢自己身上呢套Pierre-Louis Auvray設計的「爆肌」造型。

「肌肉裝」設計師 炮製頭套

同Kanye West勉強算得上係「親戚關係」嘅Travis Scott，近日亦試過佩戴上同款頭套現身主題樂園湊女，同埋去Dior×Cactus Jack時裝騷捧場。這款印上耶穌同天使圖案的頭套能夠同時被兩位潮流界大紅人睇中，負責設計的法國設計師Pierre-Louis Auvray當然值得你去認識。

Travis Scott去Dior×Cactus Jack時裝騷都戴上同款頭套，此頭套正面印上耶穌及天使圖案，並設有大量氣孔。
  • Travis Scott去Dior×Cactus Jack時裝騷都戴上同款頭套，此頭套正面印上耶穌及天使圖案，並設有大量氣孔。
Kylie Jenner都有着過Pierre-Louis Auvray設計的連身服，難怪佢老公Travis Scott同前姐夫Kanye West都會戴上同款頭套。
  • Kylie Jenner都有着過Pierre-Louis Auvray設計的連身服，難怪佢老公Travis Scott同前姐夫Kanye West都會戴上同款頭套。

在英國時裝名校Central Saint Martins畢業嘅佢擅長創作超科幻的「肌肉裝」，其充滿未來感又帶點動漫風格的怪誕設計連Kylie Jenner及Cardi B都捧場。Kanye West自己亦有着過一套出自他手的藍色「爆肌」造型，睇多兩睇仲同佢為YEEZY GAP設計的Round Jacket有異曲同工感覺，話唔定到系列登場時，可能會有正式聯名合作呢！

撰文：賴文曦