Game迷潮友出動！必搶PS人氣商品

全球6對激罕當炒

提起Travis Scott，樂迷除咗記得《Sicko Mode》等名曲外，佢跟大品牌嘅聯乘商品同樣備受潮友追捧！著名運動品牌Nike係佢經常聯乘嘅單位之一，最近更加入咗PS推出Nike Dunk Low Cactus Jack×PlayStation鞋款。該鞋款採用忌廉、灰及啡三色設計，特別之處係左右鞋踭位置分別有PS嘅英、日文Logo刺繡，而左右鞋底分別印上PlayStation嘅英文及日文。而後方裁片則有遊戲機生產商字樣，處處充滿新鮮感！不過呢對特別版只生產6對，除咗Travis Scott有一對，其餘5對則透過抽獎送出。而波鞋轉讓平台StockX已有對此聯乘版「萬萬聲」嘅投標，想入手難度不低呢！

網址：https://bit.ly/36Gqksr

聯乘鞋款全球只生產6對，當中5對以抽獎形式送出，極其罕有珍貴。

鞋底印上PlayStation嘅英文及日文。

夠破格手掣多搞作

除咗打機，想進一步感受PS魅力仲有其他方法！話說英國嘅Paladone公司最近就攞正版權，推出咗一系列嘅PS主題生活雜貨，包括有馬克杯、獎盃形玻璃杯、鬧鐘、座枱燈及啤牌，而且設計更充滿驚喜！例如馬克杯除咗印有大大個PS嘜頭，手柄更採用PS手掣作設計，而且像真度甚高，親切感滿分！其他出品同樣得意，分別有PS手掣形鬧鐘，以手掣上嘅圓圈、三角、四方及交叉符號來設計嘅座枱燈，至於啤牌除咗以圓圈、三角、四方及交叉符號來代替葵扇、紅心、梅花及階磚，就連盛載撲克嘅盒子，亦融入PS1嘅設計，粉絲們肯定愛不釋手。

網址：https://bit.ly/39AQO0t

將PS手掣融入馬克杯手柄嘅設計確夠一絕，各售￥1,800（約HK$133）。

鬧鐘外觀採用PS4手掣作設計，並以1：1炮製，幾可亂真，售￥3,618（約HK$268）。

低調誇張各有所好

PS5今期咁Hit，就算未搶到遊戲機，不妨先購買相關主題產品頂癮！啱啱推出咗一批採用PS5嘜頭及無線手掣DualSense線條圖案設計嘅服飾及用品，分別有短外套、棉衣、長袖T-Shirt、棉褲、冷帽、背囊及水樽等。當中最人氣嘅莫過於灰色短外套，除PS5 Logo外，內裡更暗藏多個手掣圖案暗花，低調成熟又不失電玩味道！如果想展示Game迷本色，則一定要買圍巾，特色係攤開後會見到密密麻麻印上唔同角度嘅DualSense手掣圖案，啱晒愛高調嘅粉絲！

網址：https://bit.ly/2L1mqCi

新登場一系列PS5主題用品，整體感覺有型時尚。

低調之選有呢款短外套，Logo嘅Size恰到好處，售US$179.95（約HK$1,404）。

撰文：張超駿

圖片：互聯網