玩轉瓦通紙！紙皮箱變潮物

幾可亂真！紙皮做背囊

瓦通紙製成嘅紙皮箱，跟潮流似乎完全扯唔上關係，不過呢個諗法或者要改改。話說兩個日本時裝品牌doublet及beta post最近聯手推出一款紙皮盒背囊！單睇賣相，的確令人誤以為係由瓦通紙製造嘅速遞紙皮箱，但其實另有乾坤——以經加工營造摺痕嘅豬皮，跟染咗色嘅高密度聚乙烯纖維「特衛強」（Tyvek）作布料黏貼，製造出類似瓦通紙嘅質感。更有趣係，背囊上特別印上速遞發貨單，令整體感覺維妙維肖，相信有力喺潮流界成為話題。不過要將呢個紙皮盒孭上身並唔便宜，售價為¥130,000（約HK$9,490）。

網址：https://doublet-jp.com

紙皮盒背囊除咗刻意製造了摺痕外，更印上了發貨單，像真度超高。

將紙皮盒背囊孭上身，確係夠晒別具一格。

專心工作！紙板包圍書枱

疫情下唔少人需要在家工作，跟家人同住嘅話，難免會影響工作專注度。而琉球大學嘅1年級學生島袋鈴菜便用瓦通紙構思咗一張「任何地方都可以用的書枱」，似乎係有效嘅解決方案！簡單講，呢張枱前方及左右兩邊都有瓦通紙圍起來（高130cm、前方闊80cm、側邊闊60cm），讓用家可以跟周邊環境隔絕。枱面部分有三段高度調節，想站立辦公亦無問題。而且有圍板可阻隔飛沫，基於防疫考慮，辦公室使用也相當合適。售價為¥3,980（約HK$291）。

網址：https://aifudousan.base.shop/items/32483928

書枱嘅賣點係前方及左右兩邊都有高130cm嘅紙皮圍板包圍，大大減少周邊環境嘅影響。

枱面設有3段高度調節，想站立辦公亦十分方便。

過癮好玩！超精緻動物模型

瓦通紙亦適合作為玩具嘅材料使用。日本玩具品牌Edison Toy推出嘅Kontamo系列，便利用瓦通紙來製作立體動物模型。由於組裝過程唔需要使用剪刀等利器，並且難度一般（依照數字順着等高線黏貼即可），加上模型製成品外形夠別致，所以吸引唔少小朋友捧場。而且完成品可以用普通顏料上色，更添趣味。該系列剛推出6款全新恐龍模型，選擇豐富。Kontamo系列分為大（全12款）及小（全16款）兩種Size，售價¥900起（約HK$66）。

網址：https://bit.ly/3m8AJD6

由瓦通紙製作嘅Kontamo動物模型系列，無論趣味及賣相都相當不俗。	組裝過程唔需要使用剪刀等利器兼且近乎冇難度，小朋友啱玩。	自己可以動手上色，增添更多趣味。

撰文：張超駿

圖片：互聯網