點止手提風扇咁簡單

風扇×充電　電話救星

平日出街，遇上手機無電，真係慘過世界末日！不過有咗Owltech呢把具備叉電功能嘅手提風扇就唔怕啦！風扇擁有2500mAh電池，叉滿電可使用2.5小時至10小時，只要將手柄分拆出來，就可以變成「尿袋」為手機充電，適用於Type C插頭。風扇本身設有三段風力調節，除咗手持之外，可使用附送嘅插座、又或者將手柄屈後固定於桌上，以及掛於頸上使用。風扇約重200g，不算十分輕，但勝在可一物兩用。備有粉紅、粉藍、深藍及白色選擇，每把售¥3,280（約HK$239）。

網址：https://www.owltech.co.jp/product/hf02

除咗用來降溫，風扇更可分拆電池作尿袋使用。

附送插座，可固定放於枱上。

風扇×保濕　雙倍涼快

風扇吹得耐會令皮膚乾燥，兼備加濕功效嘅HBLINK掛頸風扇便正好解決這個煩惱。只要注入適量嘅水，風扇就會從出風口噴出水霧，由於運用超聲波技術，所以水霧極幼細，涼快舒適兼時刻滋潤肌膚。流線形嘅頸位設計，戴上後亦唔覺重。採用USB叉電，電池容量大，長時間於戶外使用都夠電。而且可以360度調校角度及摺疊收納，帶出街非常方便。備有白、黑、橙三色，分別係白兔、小惡魔、小鹿主題，設計很有心思。一套兩把售¥5,500（HK$402）。

網址：https://gloture.jp/products/hblink-neck-fan

HBLINK掛頸風扇可同時噴出水霧幫你保濕。	風扇可以360度調校角度及摺疊收納，使用方便。	備有白、黑、橙三色，分別係白兔、小惡魔、小鹿主題，設計可愛。

風扇×LED燈　自拍必備

今時今日，生活離不開影相打卡，女士們尤其喜歡Selfie，但如果現場環境太暗，拍出來嘅照片效果唔理想，呢個時候就需要一盞自拍補光燈。於日本樂天市場購物網便搵到呢把附有LED燈嘅手提風扇，簡單講風扇嘅圓形外框就係LED燈，設有三種光暗程度，只要將風扇夾喺手機前置鏡頭上，即時可以幫你補光。夾子可開展至3cm嘅闊度，就算比較厚嘅手機殼都可用得到。當然，除咗自拍燈外，有需要時亦可作照明用途。風扇手柄最多可摺90度，方便座枱使用。售¥2,980（約HK$218）。

網址：https://bit.ly/32CtsCs

手提風扇兼備自拍補光燈功能，幾暗嘅地方拍照都唔怕變「黑面神」啦！

風扇手柄最多可摺90度，方便座枱使用。

撰文：明藹寧

圖片：互聯網