炸雞、家具聯乘潮界齊玩嘢！

入手炸雞鞋要「食炒」

兩年前，由NIGO主理的日本潮牌HUMAN MADE率先與KFC聯名合作，以美式復古風格演繹一系列單品設計。去年俄羅斯品牌MAM CUPY及洛杉磯品牌SANDALBOYZ亦先後與KFC攜手打造漁夫帽及拖鞋，但話題性點都唔及早前於官網一出即斷市的KFC×CROCS涼鞋。

早於今年2月，網上經已有雙方合作的消息，但當時好多人以為可能只係「炒作」，冇諗過鞋面印滿炸雞圖案仲有兩件立體炸雞裝飾的「炸雞鞋」真係會正式投產。呢對原價60美元的「炸雞鞋」於官網推出瞬間賣晒，現時各大波鞋轉售網站已經炒至90美元以上，應該好多人都估唔到連買KFC都會有「食炒」嘅一日。

鞋面兩件造型逼真迷你的立體炸雞，可自由拆卸。	鞋底採用KFC炸雞紙籃設計，鞋踭分別有「Kentucky Fried Chicken」字樣及Harland David Sanders肖像。	KFC×MAM CUPY漁夫帽一反轉就變成炸雞籃，設計相當有玩味。
KFC×SANDALBOYZ拖鞋設計用上最代表性的紅白兩色。	除了兩款拖鞋外，聯名系列更推出襪款及上衣畀你襯晒成個「炸雞Look」。	NIGO向來熱愛美式復古文化，於2018年就曾以個人品牌HUMAN MADE與KFC聯名合作，更親身上陣演繹系列服飾。

被抽水不如自己賺？

除了炸雞踩入潮界外，一直主打北歐傢俬設計的IKEA，唔知係咪因為近年先後受到BALENCIAGA、PLEASURES及CHINATOWN MARKET等品牌將其FRAKTA Bag「改頭換面」所啟發，與其被人「致敬」抽水，不如索性自己推出服飾系列賺埋佢仲實際。

新系列服飾設計分別加入黃底藍字Logo及Barcode條碼圖案，但可惜只限IKEA東京原宿店及日本官網發售。	CHINATOWN MARKET之前與PLEASURES合作，將IKEA招牌袋款FRAKTA Bag改裝成FRAKTA Cap，賣38美元，仲要好快賣晒。	呢張Virgil Abloh×IKEA地氈，去年推出時十分搶手。

早前IKEA就宣布推出EFTERTRADA COLLECTION，將自己標誌性的黃底藍字Logo及Barcode條碼圖案融入連帽衞衣、短袖上衣、帆布袋、水樽及雨傘等多款生活單品中，驚喜程度不下於去年推出的Virgil Abloh×IKEA聯名系列，不過可惜EFTERTRADA COLLECTION只限於IKEA東京原宿店及日本官網發售，想入手就自己諗諗計。

撰文：賴文曦　

圖片：互聯網