日本鐵路便當135周年 4大車站必食之選
鐵道迷去日本旅行，除了找尋特色鐵道外，也不可錯過「駅弁」，即鐵路便當。自從1885年（明治18年）關東櫪木縣的宇都宮車站開始售賣第一款駅弁至今，日本鐵路便當已經有135年歷史。經過了多年發展，鐵路便當味道用料豐富多變，甚至還會定期舉辦「駅弁大會」。今次就為大家精選4大車站人氣便當，下次知道點揀啦！
東京站 最頂級伊比利黑豬
被喻為東京表玄關（正門）嘅東京站，係日本全國新幹線網絡嘅最大據點，亦係東海道本線及東北本線等主要幹線嘅起始站，跟33個都道府縣連結，每日有約3,000班列車出發及到達。而車站剪票口內嘅最大商場GRANSTA，有大量售賣各地便當嘅店舖，要數當中必試之算，首推由eashion出品嘅西班牙產Bellota伊比利黑豬便當，其巴閉之處係便當採用最高級伊比利黑豬Bellota嘅豬肉製成，據講該豬以橡果餵飼，豬肉脂肪入口即溶，加上以鹹中帶甜嘅醬油來烹煮，超級滋味。而呢個便當更喺GRANSTA人氣便當排名中連續多年奪得第1位，「味力」不容置疑。每個售¥1,100（約HK$79）。
網址：https://www.eashion.jp/menu/bento/27
新大阪站 復活懷舊風味
集合了西日本旅客鐵道（JR西日本）、東海旅客鐵道（JR東海）及大阪市高速電氣軌道（Osaka Metro）嘅車站，兼且作為大阪府內唯一新幹線車站嘅新大阪站，是東海道新幹線嘅終點站及山陽新幹線嘅起點站。喺站內要購買便當，駅弁Nigiwai是不少旅客嘅首選，有多達100種唔同嘅選擇。心水推介係水了軒八角便當。該款口味自1975年起便喺大阪車站開始發售，外觀以京都府八幡市八角堂作設計靈感。由於強調關西風嘅清淡口味，便當內沒有炸物，取而代之有香菇、椎茸、茄子、穴子鳴門卷、高野豆腐等十多種食材，全盛時期每日賣出2千個。雖然水了軒曾於2010年倒閉，幸好有新製造商於同年買下工廠，這款滋味才再度復活。每個售¥1,131（約HK$81）。
網址：http://www.suiryoken.co.jp
札幌站 北方海產匯集
札幌站作為札幌市以及北海道嘅代表車站，係JR北海道嘅交通樞紐，你可以乘搭前往道內各地嘅特急列車、連結新千歲空港嘅快速Airport列車，及連接札幌近郊嘅普通列車，每日人流超多。該站嘅便當選擇豐富，若想感受當地風味，推介你弁菜亭出品嘅海鮮蝦夷賞味便當。呢款便當從1983年開始售賣，可算係札幌站內人氣第一之選，材料十分豐富，打開盒蓋，會見到蟹肉、海膽、帆立貝、三文魚子及三文魚，配以醋飯墊底，想一次過品嘗多種北海道海鮮嘅朋友就啱晒。每個售¥1,080。（約HK$78）
網址：https://www.ekiben-sapporo.net
新潟站 得獎散壽司便當
作為新潟市代表車站嘅新潟站，係上越新幹線嘅終點站及本州日本海側鐵路網嘅中心站，旅客可到此乘搭信越本線、白新線、越後線及磐越西線。新潟以米馳名，而且瀕臨日本海，便當出品理所當然地精彩。車站嘅駅弁屋有唔少便當選擇，其中新發田三新軒蝦千兩散壽司便當，曾獲得2017年便當選舉總冠軍「駅弁大將軍」榮譽，打開盒子看到散發金黃色色澤嘅厚片玉子燒，以蝦鬆點綴，下面藏着蒲燒鰻魚、醋漬小肌、魷魚和蝦子，並選用當地馳名嘅新潟米，吃上每一口都覺得幸福無比。這個便當冬天產量較多，數量限定。每個售¥1,380（約HK$99）。
網址：http://masaka.ekiben.or.jp
京阪電車有「湯瑪仕」主題列車
大家都知日本火車出名多搞作，京阪電車（京阪電氣鐵道）即日起有《湯馬仕小火車》（Thomas & Friends）作主題包裝嘅「京阪電車火車頭Thomas號2020」行駛。《湯》早於1984年喺英國ITV網絡上首次播出，就連香港及日本亦有唔少Fans。而該主題列車行駛區域喺交野線嘅枚方市站與私市站之間，並預定會行駛至7月31日。
網址：https://www.keihan.co.jp/traffic/thomas2020
撰文：明藹寧
圖片：互聯網