美人女將服侍你 3大必住旅館
去日本住溫泉旅館，除咗享受泡湯外，負責接待嘅女將同樣係一大亮點。女將即家族經營溫泉旅館嘅女主人，佢哋統統經過嚴格訓練，一舉手一投足都散發傳統和式美，部分美人女將更成為旅館生招牌，夠晒代表性！以下介紹嘅3間溫泉旅館，旗下女將都因美貌及獨特魅力備受當地傳媒追捧，如此巴閉當然要望多兩眼喇！
地區觀光代表
位於和歌山嘅白濱溫泉有唔少旅館酒店，其中嘅溫泉民宿望海可算係人氣之選，事關助陣嘅若女將原Nodoka，係享負盛名嘅美人！呢位若女將經常被電視及雜誌訪問，亦曾拍廣告，就連白濱嘅觀光海報都搵佢做模特兒！而佢坐鎮嘅民宿本身係一間3層木造建築，共有14間和式房間及1間洋式房間，並有男女湯浴場，讓大家享受由泉源直接流入嘅甘露之湯。用餐方面，民宿會親自出海捕獲各種新鮮海產，就連蔬菜都係自家種植，讓大家享受最新鮮滋味。
溫泉民宿望海
網址：http://www.boukai.jp/new
話題模特兒
位於神奈川縣湯河原溫泉、喺1957年開業嘅旅館魚判，擁有話題若女將谷澤杏奈。佢現年27歲。本身係模特兒，曾喺《ViVi》等潮流雜誌登場，並且經營自家設計品牌Candice。後來佢以和服Look於電視節目驚艷亮相後，當堂引起注目，更不時被媒體採訪！而旅館魚判作為家族生意，谷澤也順理成章成為了若女將。該旅館設有兩個室內溫泉池，更有3間客房附室內溫泉。而谷澤話聽從海外旅客建議，既琢磨益壽食品菜單，更為女性旅客推出臉部美容等，令訪客相當受落！
旅館魚判
網址：https://www.uohan.net
貨真價實偶像
位於滋賀縣高島市嘅小型旅館宝船溫泉湯元ことぶき，內裏可以搵到偶像女將大久保琴江！佢本身係旅館嘅太子女，大學畢業後成為若女將，但佢因為熱愛音樂，於2015年跟隊友Suzu組成跳唱偶像組合AH（嗚呼），並以りりかる＊ことぱぉ為藝名，成為獨一無二嘅偶像女將。旅館大約於50年前開業，每日只招待四組客人，旅館內大浴場有露天及內湯各一，亦有包場溫泉可預約，晚餐則提供馳名近江牛料理。大久保話有粉絲專程入住旅館捧場，而佢嘅目標係成為滋賀縣嘅觀光大使。
宝船溫泉湯元ことぶき
網址：https://www.takarabuneonsen.com
女將與若女將
女將是指家族經營嘅高級旅館女主人，通常都是世襲，由奶奶或媽媽傳給媳婦或女兒。稱呼上，媽媽或奶奶稱為大女將，女兒或媳婦稱為若女將。喺傳統日式旅館中，女將負責館內大部分事務，除了接待客人、送迎往來外，更要保持服務品質、管理及指導員工、建議餐飲種類等等，近年更要肩負網上宣傳。現時女將不單喺旅館出現，亦會稱呼喺餐廳或居酒屋工作嘅女侍應為女將。
女將育成課程
雖然女將多數由家族傳承，但隨住人口老化，現今亦有聘用制嘅女將。而藤田觀光係其中一間提供女將育成課程嘅機構，每年提供約16堂系統性培訓課程，不單教授招待方面嘅技巧，亦包括日本傳統飲食文化，就連站立姿勢、行為舉止、穿着和服等亦一絲不苟地教導，務求培訓出女將未來接班人。
網址：https://www.fujita-kanko.co.jp/sub/
FB專頁Like爆女將
日本一間專為旅館宣傳嘅公司幾年前舉辦咗「若女將48」計劃，招攬全國各地女館嘅若女將成為其中一員，並開設Facebook專頁「若女將48」，女將們會不時上載日常生活、美食、風景等照片，吸引世界各地遊客，當中當然不乏清秀可人嘅女將。如果想了解更多女將嘅種種，不妨望望。
網址：https://www.facebook.com/wakaokami48/
撰文：明藹寧
圖片：互聯網