好萌好治愈！秋葉原3大女僕Cafe

「主人，攰唔攰呀？」「主人，等我斟杯茶畀你慢慢歎……」以上喺電視劇或漫畫中睇到嘅情節，現實中亦唔難搵到。喺日本東京動漫基地秋葉原，女僕Cafe多不勝數，漂亮嘅女僕隨時恭候，男士們可一嘗當「大爺」嘅滋味。今次為大家介紹三大人氣之選，就算唔識日文雞同鴨講，但女僕們嗲聲嗲氣，都足以叫你樂在其中呀！

店內設有舞台，女僕們會不定時上台表演，部分成員甚至組成偶像團體出唱片。

女僕偶像潮語始創

要喺秋葉原幫襯具規模、又夠江湖地位嘅女僕Cafe，@home cafe絕對係當中嘅表表者。該Cafe早於2004年已登陸秋葉原，經營上一直走在女僕Cafe業界嘅最前線。招呼方面，進入店舖後會有女僕說聲「歡迎回家，主人」，而送上飲品時會唸「萌萌心動！」等咒語，端上蛋包飯等食物時則會用茄汁畫圖案，非常Kawaii！某些套餐還包括和女僕玩遊戲或合照，夠晒互動盡興。不過更巴閉係女僕會定時定候表演，而2005年該店嘅女僕更組成咗偶像團體「完全女僕宣言」，佢哋嘅口頭禪「好萌」喺同年更獲得流行語大賞。之後@home cafe亦出過幾隊組合，當中以成員志賀瞳（Hitomi）人氣最高，更被委任為秋葉原觀光親善大使。

喺@home cafe用餐，當女僕將食物或飲品端上桌時會唸魔法咒語，好冧呀。

Cafe布置似間小型劇院，方便大家睇Show及跟女僕交流。

若點選蛋包飯，女僕會用茄汁在蛋上畫上可愛圖案，售¥900（約HK$63）。

呢款Princess Sundae係必點之選，打卡一流，售¥700 （約HK$50）。

呢款Princess Sundae係必點之選，打卡一流，售¥700 （約HK$50）。

揀選特定套餐，就可以跟可愛女僕合照。

@home cafe

網址：https://www.cafe-athome.com

科幻可愛貓咪化身

另一間心水推介係Akiba絕對領域。該店喺2017年開業，半年間就於TripAdvisor千代田區餐廳排行榜中取得第一名。之後陸續開分店，第4間分店Akiba絕對領域 A.D.2045於上年開幕，布置相當有特色——店舖以「Cyberpunk×可愛」為設計主題，而店內所有店員都設定為貓嘅化身，亦會給你貓耳髮箍玩埋一份。只要扮貓叫，貓咪女僕就會前來座位陪你傾偈。而且店舖特別設計了原創動畫角色四宮Nia作為店嘅主題人物，店內屏幕更會不時播放角色跳舞動畫。想要更盡興，不妨幫襯包含女僕拍照及現場表演嘅套餐，事關店舖中央設有舞台，女僕會登台表演御宅藝舞蹈，感覺有啲似啦啦隊形式，包括鼓掌、跳躍和喊口號，氣氛一流。

Akiba絕對領域內所有店員都係貓嘅化身，戴住貓耳髮箍撒嬌係佢哋嘅強項。

Akiba絕對領域 A.D.2045是第4間分店，以「Cyberpunk×可愛」為主題，明亮嘅霓虹燈好有未來Feel。

Akiba絕對領域 A.D.2045是第4間分店，以「Cyberpunk×可愛」為主題，明亮嘅霓虹燈好有未來Feel。

Cafe特別設計原創動畫角色四宮Nia作為店嘅主題人物，甚得宅男歡心。

嫁召喚蛋糕以四宮Nia為主題，就連隻碟都係召喚魔法陣圖案，售¥800（約HK$58）。

嫁召喚蛋糕以四宮Nia為主題，就連隻碟都係召喚魔法陣圖案，售¥800（約HK$58）。

Akiba絕對領域 A.D.2045

網址：https://akibazettai.com

中世紀風變身貴族

想感受較含蓄氣氛，於2001年開業嘅CURE MAID CAFE會係你杯茶。此店歷史十分悠久，但女僕們並唔會玩遊戲，亦唔會跟客人有好熱情嘅交流，而且穿着亦非常密實，以傳統黑白女僕長裙Look現身，喺輕柔古典樂下，讓人彷彿穿梭時空，化身成中世紀貴族。另外，自2011年起Cafe被日本紅茶協會認證為「好喝紅茶的店」，一場來到一定要飲番杯。食物方面也極有水準，例如蛋包飯唔用番茄醬，改用西餐常見的Demi-Glace牛肉醬和充滿奶香嘅白醬，輕食類有德國香腸、炸薯條、沙律等，甚至有適合素食者嘅食品。逢周六晚還會舉辦3場小型音樂會，有古典音樂亦有動漫樂曲，無論紳士定宅男都啱Feel。