福鼠報喜 財運暢旺
今日係大年初三，祝大家財源廣進，身體健康！講到財源滾滾，個人嘅努力固然唔少得，但財運更係必不可少，想喺今年財運亨通嘅話，就要睇吓梅花易數專家常歡師傅嘅教路，知道自己今年嘅財運之餘，同時點樣廣納財運。
12生肖流年財運
今年嘅財運係點？相信係每個人都會關心嘅問題，而常師傅指出每個生肖嘅流年財運雖然都唔同，但只要知道整體運勢，加上掌握旺財方位及佩戴合適催財飾物，便可以達到催旺財運嘅作用。
鼠 宜靜不宜動
雖然肖鼠嘅朋友今年有財星「金匱」降臨，但因今年犯太歲，所以凡事宜靜不宜動，如有創業計劃，或作出重大投資，更應該三思而後行，反而小小嘅投資會有唔錯嘅回報。今年財位係正西方，旺財顏色係金色，宜佩戴金色飾物。
牛 有利可圖
肖牛嘅朋友去年凶星較多，故好多時要小心行事，今年因與太歲相合，運勢不但會有所提升，喺工作或生意上，如果能與人合作更係有利可圖，財運亦會一直向上。今年利東南方，旺財顏色為紅色，佩戴紅色飾物有利財運。
虎 愈動愈有利
今年因為驛馬星動，喻意要多走動，所以肖虎嘅朋友愈動愈有利。如果平日唔方便到處走動嘅話，可以去多啲旅行。今年財位喺西北方，催財顏色為藍色，不妨着多啲藍色衫或佩戴藍色飾物。
兔 喜事來臨
今年紅鸞星動，單身嘅肖兔男女有機會搵到心儀嘅另一半，而蜜運中嘅則有機會開花結果。由於大利桃花人緣，人際交流亦會順利，不過要注意今年係刑太歲，要小心是非。今年財位係正北方，旺財顏色為黑色。
龍 生意興隆
今年有「華蓋星」降臨，肖龍嘅朋友會特別容易吸引到其他人注意，打工仔同做生意嘅朋友，容易獲上司及客人賞識，因此要好好把握機會發揮所長及表現自己，財運自然更加好。今年財運利正南方，而旺財顏色為紫色。
蛇 順風順水
肖蛇朋友今年嘅運勢相當唔錯，因為貴人相當多，做起事嚟自然會更加順風順水，尤其係講求同其他人合作嘅工作，更因有貴人出手襄助，凡事事半功倍。今年財運利東南方，喺呢個方位擺放風車有利財運，而旺財顏色為綠色。
馬 小心破財
肖馬嘅朋友今年要留意，因為沖太歲令運勢唔穩定，並且易受到沖擊，係變化同波動都相當大嘅一年，所以凡事要忍讓，千祈唔好因為意氣用事，而出現破財嘅情況。今年財位喺正東方，宜擺放木製擺設催財，及穿着青色衣服亦有利財運。
羊 支出較大
肖羊嘅朋友由於今年害太歲，特別要提防小人暗中放箭，此外亦受「耗星」影響，代表支出會比較大，因此最好喺財務安排上做好準備以防不時之需。今年財運利正南方，擺放馬形擺設可催旺財運，旺財顏色為橙紅色。
猴 有貴人助
雖然今年有貴人星，喻意有貴人嘅幫助，但同時亦有唔少凶星，因此肖猴嘅朋友要特別小心人際關係方面，會比較易出現亂象，尤其係一啲要同其他人合作嘅事務，更係需要多加提防。今年西南方有利財運，旺財顏色為黃色。
雞 時好時壞
肖雞嘅朋友今年破太歲，運勢上容易出現反覆嘅情況，財運時好時壞，宜多作儲備，凡事應以小心安全為上。今年財位係東北方，擺放牛形擺設有助財運，旺財顏色則為啡色。
狗 穩打穩紮
喺12生肖之中，肖狗朋友今年嘅財運相對比較平順及冇太大嘅變化，不過正因為冇太大變化關係，所以凡事都以穩打穩紮為上，切勿急躁冒進，反而應該多作計劃而行事。今年財運利正南方，喺呢個方位擺放紅色利是封有利財運，而催財顏色為紅色。
豬 切忌冒進
肖豬嘅朋友今年嘅財運有望回升，不過唔好因此而衝動，反而應該慢慢地做事，投資計劃亦切勿貪功冒進先為上策。今年利正西方，宜喺呢個方位擺放銀器催動財運，穿着銀色衫或佩戴銀器首飾同樣旺財。
邊個數字最旺財？
人冇正財不行，冇橫財亦不富，因此不論投資或小注怡情，都同數字有密不可分嘅關係，常師傅就為大家帶來12生肖流年旺財號碼，不妨作為參考。
生肖 旺財號碼
鼠 1、6、7
牛 8、9
虎 1、6、8
兔 1、3、6
龍 4、9
蛇 3、4
馬 3、4、9
羊 4、9
猴 0、2、5
鷄 2、7、8
狗 6、9
豬 6、7、8
撰文：林國豪
部分攝影：張群生
模特兒：Coco
鳴謝：梅花易數專家常歡