副刊
專家教路：油頭做型爸！
Hair House Barbershop by Adam Chan主理人Adam Chan。
如果要為一款髮型定一個年齡限制的話，油頭（Pompadour）嘅「合法年齡」應該適用於30歲或以上男士。雖然冇明文規定十零廿歲唔油得頭，但通常開始會去Barbershop剪髮而唔再去Salon的，大多數都是30出頭的男士，未必一定位位都事業有成，但普遍都開始成為人哋老公甚至一位新手爸爸，希望從一個整齊企理髮型開始，建立初熟男士或父親應有形象。趁父親節將至，特別介紹Barbershop油頭文化，並邀請人氣Barbershop主理人Adam Chan，跟男士分享相關歷史及知識。
細說油頭文化
位於北角渣華道的僑冠理髮店由1983年開業至今一直分開男賓（地下）及女賓（一樓）服務，不過由於沒新人入行，行業亦面臨式微，相當可惜。（B）
1962年於灣仔春園街開業的愛群理髮，舊店設於巷仔，是香港廣東理髮廳代表。去年店舖遷至灣仔茂蘿街動漫基地之內，由家族第2代後人Mark主理。（C）
2016年開業的張梁記，是香港最具代表性的油頭產品店舖，由髮油、洗頭水、古龍水、鬚後水、髮梳、剃鬚刀及毛掃都一應俱全。（D）
可能好多人都認為髮型和衣着一樣有潮流，當男生被千禧年後的「飛輪海頭」、「棒棒堂頭」又或者「都敏俊頭」洗禮過後，貼服令立的油頭就好似係放眼當下唯一選擇。其實油頭的定位根本就如—件白恤衫，實在不存在任何「興定唔興」問題，只在於你個人鍾意與否。油頭於上世紀30年代歐美等地差不多是男士指定髮型，正如返學着白恤衫一樣咁理所當然。於香港50年代左右開始出現舊式理髮廳，其實亦是從西方Barbershop演變過來，服務對象同樣是男士，除剪髮外亦提供剃鬚服務。只是80年代香港經濟起飛，男士們開始鍾意去Salon，貪其剪髮之餘亦可以染髮及電髮「整色整水」，變相令傳統舊式理髮廳逐漸式微。
Barbershop點止剪髮咁簡單？
Adam現時主要長駐於灣仔分店。
自家品牌飛仔髮乳，盒面的港式漫畫風格插圖亦是由Adam親自設計。（由左至右）FadeJai Grease Pomade、Gum Pomade、Deluxe Pomade及Fibre Cream $180/各（A）
早前Hair House Barbershop by Adam Chan成立6周年，推出限量100塊的飛仔滑板。
隨着美式復古文化及紳士造型興起，男士們近年重投這種層次鮮明、輪廓突出兼且散發陣陣男人味的髮型，所以近4、5年Barbershop於香港如同雨後春筍般出現於街頭巷尾，當中由Adam Chan主理的Hair House Barbershop by Adam Chan，就堪稱城中知名度極高的Barbershop。擁有近20年剪髮經驗的Adam一直希望專注追求男士髮型精髓，所以2013年於中環開設第一間Barbershop，顧客清一色為男士，而且只提供剪髮及剃鬚服務，不像一般Salon會有電髮及染髮，其後生意穩定後再於灣仔開設分店，而他本人亦長期駐守此店。
Cool Grease Superior Pomade Standard $179（D）
Prospectors Iron Ore Pomade $149（D）
Man Comb New Carbon Edition $249（D）
若想找Adam或旗下Barber剪油頭記得提前預約，因為頭髮生長速度大約1個月1cm，但0.5cm增長就已經會影響油頭的Fading效果，所以普遍男士需要3個星期左右就修剪1次。因為去Barbershop次數相對頻密，而且場內基本上只得男士，無論是客人與Barber或客人與客人之間的關係亦容易變得熟落。因此Barbershop除了是父親們整理儀容的場所外，亦是男士們聚埋「打牙骹」、講吓車經兒女經減壓嘅好地方。
Interview
Q：可以講講你與油頭及Barbershop的故事嗎？
開始剪油頭時，會以髮梳整理出界線，繼而用上不同電剷做出Fading效果，並修剪出筆直髮型輪廓。
硬朗Side Part髮型最適合父親們，整齊有型亦易於打理，只要抹上髮油稍作梳整就可以出門。
A：「父親過往是搭棚師傅，需要戴安全帽工作，所以差不多十日便帶我去同一間上海理髮廳飛髮，跟理髮師的關係就像好朋友，話題圍繞跑馬及飲飲食食。自己19歲時誤打誤撞學剪髮，不太習慣同女顧客講名牌手袋或明星是非，心入面一直想開一間類似小時候光顧的男士理髮廳，於是暗地裏鑽研男士經典髮型及剃鬚技巧，到2013年終於實現夢想，成立了Hair House by Adam Chan，到2014年開始教授客人油頭技巧甚至成為旗下Barbershop理髮師，到現時兩間分店都會致力保持傳統男士髮型精髓。」
Q：香港昔日盛行的舊式理髮廳與現時的Barbershop風格相同嗎？
A：「Barbershop由古希臘、埃及、滿清到法屬上海、英屬香港，全都各有獨特變奏，例如：英式剃鬚用熱毛巾而意大利卻不用，美國因衞生條例不能用Shaving Brush。香港五、六十年代都存在廣東及上海理髮廳兩種形態；上海人普遍較高傲，所以理髮廳一定是大體整潔，而大多巷仔理髮廳都屬廣東人開，比較隨便率性，各有風味。我出生於1981年，Barbershop風格亦受英美日文化影響，其他香港現時的Barbershop亦各自有店主個人風格。」
Q：一個剪得好的油頭與父親形象有何關係？
A：「經典油頭取決於Silhouette精準及Fading之均勻，Silhouette要夠直，Fading青位漸變要均勻。硬朗Side Part油頭或清爽Crew Cut都能令每位父親看起來精神有型，接送放學、見家長大方得體，早上只要快速塗抹髮蠟即可。經典油頭線條歷久不衰，不想隨波逐流之父親們更可於Barbershop的45分鐘理髮時間內，享受男士專屬時光。」
撰文：賴文曦
查詢電話：（A）5595 3976、（B）2563 1266、（C）2303 1733、（D）3955 2466
副刊新聞