三大槍種開戰勇闖工廈CQB

平日返工返學咁忙，周末假日梗係想約埋好友打War Game減吓壓，但戶外日曬雨淋又多蚊，不如轉戰室內歎住冷氣玩CQB（近身距離作戰）。位於牛頭角工廈的City Hunter室內場，不僅提供傳統的BB彈氣槍，仲有得玩Laser Tag雷射槍及Nerf海綿彈槍，男女老少都可以射個痛快。

Laser Tag裝備唔多，穿上特製背心，手執雷射槍就玩得。

Laser Tag雷射槍無痛射擊

場內提供3類槍種選擇，假如各位怕痛的話，首選Laser Tag雷射槍，皆因它採用全無線設計，有別於坊間拖住線纜的雷射槍，唔怕被線纏繞或絆倒。City Hunter店長Louis指出，由於雷射槍採用低強度的Low Intensity Infrared技術，原理類似電視遙控器和探熱器，因此光線唔會傷眼，連眼罩都唔使戴。而特製背心設有感應器，被雷射槍擊中後會發光和發聲提示，適合新手或男女混戰。場內還可設定雷射槍子彈上限，以提升遊戲的戰略性，擊中對方所得的分數，更會顯示在大電視上。

Laser Tag使用Low Intensity Infrared技術，射出光線唔會傷眼，所以毋須戴上眼罩。

Laser Tag使用Low Intensity Infrared技術，射出光線唔會傷眼，所以毋須戴上眼罩。

特製背心設計有啲似Iron Man裝甲，中間和兩邊膞頭都有感應器，被射中會發光及發聲提示。

特製背心設計有啲似Iron Man裝甲，中間和兩邊膞頭都有感應器，被射中會發光及發聲提示。

City Hunter店長Louis表示，現時大部分客人以團體及小朋友為主，由於場內能夠畀小朋友安全地打War Game，所以家長相當放心。

City Hunter店長Louis表示，現時大部分客人以團體及小朋友為主，由於場內能夠畀小朋友安全地打War Game，所以家長相當放心。

Nerf海綿彈槍「放電」一流

玩War Game有年輕化趨勢，店長Louis表示愈來愈多家長假日帶埋小朋友開War Game派對，而Nerf海綿彈槍就啱晒佢哋。Nerf的槍款多、顏色鮮艷，所使用的Elite彈由海綿製成，射落身唔會太痛，可說是針對小朋友而設計。不過入場必須佩戴安全眼鏡，避免傷及眼睛。雖然場內掛滿重型Nerf機關槍，但對戰時只會提供輕盈款式，射程和火力較弱，一般子彈上限為10粒以內，小朋友射晒子彈後，就需要人手逐粒上彈，畀佢哋「放電」一流。

Nerf海綿彈槍雖然冇乜殺傷力，但玩家必須佩戴安全眼鏡。

Nerf海綿彈的速度冇BB彈咁快，儲彈數為10粒以內，射完便要逐粒上彈。

場地會提供輕盈款式的Nerf海綿彈槍，還有無限Elite彈。

BB彈氣槍全面罩上陣

CQB場地最常見的是BB彈氣槍，場地備有較重型的UAR步槍、機動性高的1911手槍、輕巧便攜的Q版M4等，當然玩家亦可自攜氣槍裝備，但Louis強調所有氣槍的火力都不能超過1.4焦耳，落場時亦需要戴上Full Mask全面罩，確保BB彈不會射中眼睛和臉部。此外，場地設有試槍區，提供25宮格小遊戲畀大家練吓眼界，務求以最短時間打晒25格。

CQB梗係唔少得BB彈氣槍，而自攜氣槍火力不能超過1.4焦耳。

試槍區設有25宮格小遊戲，鬥快打晒25格就贏。

玩氣槍必須佩戴Full Mask全面罩確保安全，另提供手套。

5大區域模擬實境

佔地約8,000呎的City Hunter，場內主要分為叢林區、地鐵區、貨倉區、銀行區、辦公室區5大區域，每個區域都模擬實際環境令大家玩得更投入。Louis解釋，叢林區特別擺放多種植物，內有極多隱藏位置；而地鐵區就打造了一卡列車，窄長的通道主要用作遠距離射擊；貨倉區則架設了鐵桶和膠桶，相對有較多掩護；銀行區就猶如迷宮一樣，有多個彎位和藏身點，用於戰略布陣；辦公室區內有電腦、電話、壁報板等，模擬度極高。若然有10人左右可以包半個場，足20人的話就能夠包晒成個場。