Jaguar I-PACE EV400 觸電着迷

外形討好 人見人愛

I-PACE不僅是一部集環保、智能與高性能於一身的純電SUV，其外觀設計也得到不少人的激讚，拍攝期間便聽到不只一個途人講：「嘩，部Jaguar咁型嘅！」設計靈感來自C-X75概念車的I-PACE，雖則是一部SUV，卻擁有跑車般的輪廓，賣相有點似升高咗嘅Coupe，問心，真係幾靚仔！即使是見不到的地方，I-PACE都落足工夫，如廠方特別為電動車研發的鋁合金車架便以先進的鉚接及黏接技術製造，除咗有輕量及高剛性特點外，工程師更特定把電池結合在其中，車架的抗扭度進一步提升至所有Jaguar車型中最高的36kNm/degree，配合前雙搖臂、後集成式多連桿懸掛，操控靈活性並不比跑車差多少。

錶板為數碼顯示屏，介面會隨行車模式而改變。

I-PACE支援多種充電模式，最快可在85分鐘內充至八成。

自家馬達 加速力強

I-PACE的加速性能亦唔講得少，前、後軸分別搭配了Jaguar自家研發的電動馬達，696Nm的扭力隨傳隨到，一篤「油」已飆住咁去，0~100km/h只需要4.8秒，比搭載5.0 V8 Supercharged引擎的F-PACE SVR僅慢0.5秒！基於電動車冇引擎及排氣聲，實際車速往往較感覺快得多，明明行緊100km/h，感覺只有70km/h，好容易超咗速都唔知，尤其入彎前要注意一下喇。或者有人會問，大部分電動車（包括I-PACE）都冇得自行拖波，落長命斜點搞？莫非要長時間踩住個Brake？當然不是，電動車一般都有能源回收系統，基本上鬆開油門，車速會自動大幅拖慢，持續落斜也毋須經常用到制動器，實在不用擔心過熱失效的問題。

車身賣相充滿動感，而且帶有Coupe的味道。

行李箱容量有656公升，放平後座可增至1,453公升。

滿電續航力達470km

單是外觀令人觸電是不夠，有沒有實力才是重點所在，畢竟續航力才是電動車能否成功的關鍵，而這部I-PACE是毋須擔心，其搭載的90kWh鋰電池模組由432塊鋰電池組成，充一次電就可以行駛470公里（WLTP），對多數港人用車習慣嚟講，一星期充電一次就夠。咁每次要充幾耐呢？代理話採用香港通用的50kW直流快速充電，不用85分鐘便可將耗盡的電池充至80%。若在家中使用7kW掛牆式交流電充電器，充至80%約需10小時，瞓醒一覺就搞掂。

車廂布局走簡約風，實體按鍵不多。

全車設有4區恒溫冷氣，乘坐感亦相當舒適。

前衞內裝 寬敞豪華

中型SUV定位的I-PACE不設傳統波箱，並採用座艙前移的設計，車廂空間也因此受惠，除了後排腿部空間達到890mm外，五座設定的行李箱容量亦有656公升，空間媲美不少大型SUV。已應用於Land Rover多個型號的「Touch Pro Duo」雙屏幕10吋觸控式多媒體娛樂資訊系統也首度於Jaguar車系中亮相，而且加入了為電動車導航，系統可自動尋找附近充電站位置，地點仲覆蓋香港、深圳、廣州及澳門等地，甚至可根據駕駛風格來計算續航距離及剩餘電量，中港澳三地走都冇問題。簡約的車廂帶前衞感、實體按鍵不多，譬如冷氣溫度、風速以至冷暖櫈都可在同一個旋轉按鈕調校，操控變得更簡單就手。目前，輸港的I-PACE有4個版本，包括S、SE、HSE及First Edition，在「一換一」計劃下，售價由80餘萬元起。

規格表

車型：五座位電動SUV
最大馬力：400ps
最大扭力：696Nm
驅動：四輪驅動
電池容量：90kWh
0~100km/h：4.8秒
極速：200km/h
續航力：470km（WLTP）
耗能：22kW/100km
車身體積：4,682×2,011×1,565mm（長×闊×高）

撰文：鄭浩文
攝影：張錦昌
查詢電話：2821 7147（英倫汽車）