催旺財運 富貴逼人

常歡師傅為大家教路，吸盡所有財氣，實行將正財同橫財統統贏晒入袋。

豬年財位睇一睇

2019年己亥豬年嘅正財位喺中央，而橫財位則位於東方。常師傅表示如果喺中央位擺放紅色風車可催動正財運；而喺東方擺放帶黃色或啡色嘅招財貓有助提升橫財運。至於想升職加人工或學業進步嘅話，今年文昌星坐落正北方，想提升文昌運，於正北方擺放4支黑色毛筆。做生意嘅朋友想客似雲來，就要留意喜慶貴人星位於西北方，喺呢個方位擺放綠色會開花嘅植物。另外，要留意今年太歲亦飛到西北方，故此要小心口舌是非。

喺中央方位擺番個紅色風車能催動正財運。	帶黃色或啡色嘅招財貓有助提升橫財運。	梅花易數專家常歡教大家吸盡財氣。

12生肖流年財運

大家最關心嘅梗係自己所屬生肖嘅流年財運係點，而常師傅唔單止為大家講解12生肖流年財運，仲話畀大家知道邊個方位最有利，同埋邊種顏色催旺個人財運。

豬 宜守不宜攻

肖豬嘅朋友因為今年係犯太歲之年，宜守不宜攻，唔好過於衝動，以免會做出錯誤嘅決定，穩打穩紮先至係上策。今年利正西方，而旺財顏色則為白色。

鼠 生意興隆

肖鼠嘅朋友今年獲桃花星中嘅「咸池星」降臨，呢顆星主異性運及社交活動，令人緣暢旺，亦有利增強人脈同有利生意。今年利正西方及西北方，而金色有助催旺財運。

鼠女佩戴金色飾物財運自然來。

牛仔牛女不妨選擇用紅色手袋。

牛 謀定而後動

今年肖牛嘅朋友要特別小心，因為降臨嘅凶星較多，代表變化亦比較多，適宜穩打穩紮並謀定而後動，反而對財運會更加好。今年利正南方，而旺財顏色為紅色。

虎 不宜大舉動

雖然今年肖虎嘅朋友係合太歲，同時亦係破太歲，加上降臨嘅凶星亦有唔少，不宜有大舉動，一切都係宜靜不宜動為佳。於正北方會比較易獲利，而催財顏色為黑色。

兔 易惹官非

肖兔嘅朋友今年受到「官符星」及「五鬼星」影響，呢兩顆星均主官司法律，故要小心會犯上官非而破財。今年財運利正北方，而旺財顏色為深藍色。

深藍色手提袋最啱肖兔男女。

龍女今年不妨多穿着紫色高踭鞋。

龍 喜事來臨

肖龍嘅朋友今年獲「紅鸞星」降臨，蜜運中嘅肖龍男女，將有機會喺今年拉埋天窗，正所謂「人逢喜事精神爽」，財運將會有唔錯嘅勢頭。今年利正南方，而旺財顏色則為紫色。

蛇 有大變動

肖蛇嘅朋友今年不但係沖太歲，同時又有「驛馬星」降臨，呢顆星主有大變動或將會有所轉變嘅意思。今年財運利正西方，而旺財顏色為白色。

馬 得心應手

今年肖馬嘅朋友財運相當暢旺，有唔少吉星降臨，凡事得心應手，並且事事順利。不過亦要留意，因為有「空亡星」降臨關係，呢顆星主有時會心無主見，宜多同朋友傾訴。正西方有利財運，而催財顏色則為青色。

羊 諸多阻滯

如果肖羊嘅朋友想喺今年有大作為及重大投資嘅話，便需要加倍小心，因為今年有「白虎星」降臨，凡事會多阻滯，因此喺作出決定前應多作考慮。財運利正南方，而旺財顏色為火紅色。

今年青色衫大旺肖馬男女嘅財運。	想發達，肖猴女不妨多穿着黃色裙。	肖雞嘅朋友記得啡色有利自己呀！

猴 切忌冒進

由於害太歲，肖猴嘅朋友喺財運上會比去年勞心費力，同時做事又會有事倍功半嘅感覺，因此切忌冒進，凡事要多加忍耐。今年嘅中央位有利肖猴朋友嘅財運，而催財顏色則為黃色。

雞 加薪有望

肖雞嘅朋友如果係從事文職工作，或者係在學人士，今年嘅運勢都相當唔錯，事關今年有「文昌星」降臨，此星主文職事務及有利功名學業，有利升職，加人工自然有望。財運利西南方，而催財顏色則為啡色。

狗 因病破財

因為有「病符星」降臨，肖狗嘅朋友今年要小心健康，此星預示諸多病痛，並且有疫病災禍，所以健康會較差。唔想因病而破財嘅話，最好要多加注意健康，留意飲食及休息時間。今年財運利正南方，而催財顏色為深紅色。

撰文：林國豪
部分攝影：郭凱敏、蔡浩文
模特兒：Coco
鳴謝：梅花易數專家常歡